लगातार दबाबमा पोखरा, सुदूरपश्चिमविरुद्ध पुनरागमनको आश

काठमाडौं। नेपाल प्रिमियर लिग (एनपीएल)मा पोखरा एभेन्जर्सको यात्रा सुरु देखिनै असहज रहँदै आएको छ। पहिलो सिजनमा तालिकाको तल्लो भागमा धकेलिएको टोलीले दोस्रो संस्करणमा सुखद् सुरुआत गर्ने अपेक्षा राखेको थियो।

तर, त्यो अपेक्षा पहिलो खेलमै डगमगायो। विराटनगर किंग्सले २२१ रनको विशाल लक्ष्य दिएपछि पोखराकेन्द्रित योजनाहरू क्षणमै भताभुंग भए। १६७ रनमा समेटिँदा नतिजा झन् ठूला अन्तरले प्रतिविम्बित भयो र ५३ रनको हारले पोखराको पुरानै घाउ फेरि ताजै बनाइदियो।

अब टोली शुक्रबार सुदूरपश्चिम रोयल्ससँग दोस्रो खेलमा उत्रँदैछ। कीर्तिपुरस्थित त्रिवि क्रिकेट मैदानमा यी दुईबीचको भेट अपरान्ह्र ४ बजे हुनेछ। दोस्रो खेलमा पोखराका लागि मुख्य ऊर्जा पहिलो असफलतालाई दबाब होइन, प्रेरणाका रूपमा उपयोग गर्ने हुनुपर्छ। यद्यपि, चुनौती सजिलो छैन।

पोखराका भरोसायोग्य खेलाडी ओपनर एडम रोसिङ्टन र कप्तान कुशल भुर्तेल नै हुन्। पहिलो संस्करणमा खराब प्रदर्शन गरेपनि दोस्रो संस्करणमा भने उनले केही राम्रा संकेत छाडेका छन्। विराटनगरविरुद्ध ३१ बल खेलेका उनले ५ चौका र ४ छक्कासहित सर्वाधिक ५९ रन बनाए।

ओपनर एडमले २१ बलमा ५ चौका र २ छक्कासहित ३९ रन बनाए। यी दुईबाहेक अन्यले राम्रो प्रदर्शन गर्न सकेनन्। यी दुईबीच दोस्रो विकेटका लागि ७६ रनको साझेदारी भएको थियो। तर, उक्त साझेदारीले पोखरालाई जितनजिक पुर्‍याउन सकेन।

यद्यपि, खेलपछिको कुशलले मध्यक्रम चल्न नसकेको स्वीकार गरे। तर, आफू धेरै बेर टिकेको भए नतिजा फरक हुन सक्ने उनको भनाइ थियो। त्यही पछुतो सुदूरपश्चिमविरुद्ध ‘फाइटब्याक’ को उर्जा बन्न सक्छ।

यता, साबिक उपविजेता सुदूरपश्चिमले भने पहिलो खेलमै काठमान्डु गोर्खाजविरुद्ध यो टोलीले २९ रनको उत्कृष्ट जित दर्ता गरेको थियो। यो टोलीको बलिङ सधैं आक्रामक छ। गत संस्करणमा सुदूरपश्चिमले पोखरालाई रोमाञ्चक पाँच रनले रोक्न सकेका थिए, त्यो पनि स्कट कुगुलेइनको उत्कृष्ट बलिङमा। कुगुलेइनले उत्कृष्ट संस्करणमा १७ विकेट लिएका थिए।

जनकपुर बोल्ट्सका स्पिनर ललितनारायण राजवंशीले पनि उत्तिकै विकेट लिएका थिए। तर, तर, इकोनोमीमा राम्रो भएपनि आयोजक नेपाल क्रिकेट संघ (क्यान)ले कुगुलेइनलाई भेदभाव गर्दै ललितलाई मोटरसाइकल दिएको थियो।

उक्त कुरा सायद कुगुलेइनले भुलेका छैनन्। त्यसैले उनी पहिलो खेलदेखि नै आफ्नो पुरानै शैलीमा देखिएका छन्। उनले काठमान्डुविरुद्ध पहिलो खेलमै दुई विकेट लिएर आफ्नो धार कायम राखेका छन्। पोखराको कमजोर मध्यक्रम कुगुलेइनको गतिमा झनै परीक्षामा पर्न सक्छ।

सुदूरपश्चिमको ब्याटिङ भने पहिलो खेलमा अनिश्चित देखिएको थियो। पहिलो खेलमा शीर्षक्रम फल्प हुँदा टोलीलाई कप्तान दीपेन्द्रसिंह ऐरी र हर्मित सिंहले जीवनदान दिएका थिए। हर्मितले सर्वाधिक ५३ रनको योगदान दिए। उनले २० बलमा बलमै २ चौका र ६ छक्काको सहयोगमा अर्धशतक बनाए।

त्यसैगरी कप्तान दीपेन्द्रले ३० बलमा ३ चौका र १ छक्का प्रहार गर्दै ३९ रन बनाए। अन्यले आसिफ शेखले २५ रन जोडे भने इसान पाण्डेले ११ रन जोड्दै आउट भए। अन्यको भने ब्याटिङमा योगदान लगभग शून्यसरह नै देखिएको थियो।