प्रियांक शतकबाट चुके, चितवनले पायो मध्यम लक्ष्य

काठमाडौं। प्रियांक पञ्चालको आक्रामक ब्याटिङसँगै कर्णाली याक्सले नेपाल प्रिमियर लिग (एनपीएल)मा चितवन राइनोजलाई १६७ रनको लक्ष्य दिएको छ।

कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ थालेको कर्णालीले निर्धारित २० ओभरमा ३ विकेट गुमाउँदै १६६ रन बनाएको हो।

कर्णालीका प्रियांकले सर्वाधिक ९० रन बनाए। डेब्यु खेल खेलिरहेका उनी शतकबाट १० रनले चुके। उनले ४८ बलमा ७ चौका र ६ छक्का प्रहार गरे।

म्याक्स ओ’ डाउड २० र मार्क वार्ट १६ रनमा आउट भए। पवन सर्राफले २७ र नजिबुल्लाह जद्रानले अविजित रहँदै ४ रन थपेपछि कर्णालीले खातामा १६६ रन पुर्‍याएको हो।

चितवनका सैफ जैब, सोहेल तान्भिर र रवी बोपाराले समान १ विकेट लिए।