नेपालको लगातार तेस्रो हार

काठमाडौं। नेपालले आईसीसी क्रिकेट विश्वकप लिग २ अन्तर्गत युएई भ्रमणमा नेपालले लगातार तेस्रो हार बेहोरेको छ।

शनिबार भएको तेस्रो खेलमा अमेरिकाले नेपाललाई ४ विकेटले पराजित गरेको हो। योसँगै शीर्ष स्थानको अमेरिकाले २३ खेलबाट ३४ अंक पुर्‍याएको छ। १९ खेल खेलेको नेपाल १२ अंकसहित सातौं स्थानमा यथावत छ।

नेपालले दिएको २७२ रनको लक्ष्य पछ्याएको अमेरिकाले अन्तिम ६ बल बाँकी रहँदा ६ विकेट गुमाएर २७३ रन बनायो।

अमेरिकालाई जित दिलान शैताजा मुक्कामल्लले सर्वाधिक ७५ रन बनाए। १०१ बल खेलेका उनले २ चौका र १ छक्का प्रहार गरे।

उनी र मिलिन्द कुमारले चौथो विकेटका लागि १२३ रनको विशाल साझेदारी गरेका थिए। उक्त साझेदारी नै नेपालको हारको कारण बन्यो।

मिलिन्दले भने ६६ बलमा ७ चौका र १ छक्कासहित ७० रन बनाए। सायन जाँहागिर ३६, शुभम रञ्जने १९ र समीत पटेल १६ रनमा आएट भए।

नेपालका सन्दीप लामिछानेले सर्वाधिक ३ विकेट लिए। १० ओभर बलिङ गरेका उनले ५३ रन खर्चिए।

उनीबाहेक नन्दन यादव, करण केसी र गुलशनकुमार झाले समान १ विकेट लिए।

त्यसअघि टस हारेर पहिला ब्याटिङ थालेको नेपालले निर्धारित ४९.५ ओभरमा सबै विकेट गुमाउँदै २७१ रन बनाएको थियो।

नेपालका दीपेन्द्रसिंह ऐरीले सर्वाधिक ७५ रन बनाए। ६७ बल खेलेका उनले २ चौका र ३ छक्का प्रहार गरे।

करण केसीले ३१ बलमा २ चौका र ३ छक्कासहित ४९ रनको इनिङ्स खेले।

ओपनर कुशल भुर्तेल ४७, भीम सार्की ४३ र कप्तान रोहितकुमार पौडेल ३६ रनमा आउट भए।