क्याच मिस्टेकले बाहिरिएको अस्ट्रेलिया

काठमाडौं। महिला विश्वकपको सेमिफाइनलमा जेमिमा रोड्रिगेजको अविजित शतकले भारतलाई बिहीबार ५ विकेटको जित दिलाउँदै फाइनलमा पुर्‍यायो।

अस्ट्रेलियाले दिएको ३३९ रनको ठूलो लक्ष्य भारतले ४८.३ ओभरमा ५ विकेट गुमाएर पूरा गर्‍यो। यो महिलाको एकदिवसीय क्रिकेट इतिहासमा सबैभन्दा ठूलो रन लक्ष्य पछ्याएर जित्ने रेकर्ड हो।

भारतको स्कोर त्यतिबेला २०६ थियो र जेमिमा रोड्रिग्सको व्यक्तिगत रन ८२। सो समयमा अलाना किङको बलमा उनले दिएको क्याच विकेटकिपर एलिसा हिल्लीले समाउन नसकिन्। त्यो मौका उपयोग गर्दै जेमिमाले शतक पूरा गरिन्।

पछि टोलीको स्कोर २८४ हुँदा पुनः एकपटक जीवन पाइन्। यसपटक ताया म्याक्ग्राले उनको क्याच झारेकी थिइन्। यी दुई क्याच मिस्टेककै कारण समूह चरणमा अपराजित रहेको अस्ट्रेलियालाई प्रतियोगिताबाट बाहिरिनुपर्‍यो।

ठूलो लक्ष्य पछ्याउन आएका भारतका लागि सुरुआत राम्रो रहेन। टोलीको १३ रनमै शेफाली वर्मा (१०) र ५९ रनमै स्मृति मन्धाना (२४) आउट भइन्। त्यसपछि जेमिमा र कप्तान हरमनप्रीत कौरले १८७ रनको साझेदारी गर्दै जितको आधार तयार गरे।

हरमनप्रीत ८८ बलमा १० चौका र २ छक्कासहित ८९ रन बनाएर आउट भइन्, तर जेमिमा अझै टिकिरहेकी थिइन्। अस्ट्रेलियासँग खेल्दा १६७ रनको साझेदारी हुँदा नै जेमिमालाई आउट गर्ने अर्को मौका अस्ट्रेलियाले गुमाएको थियो।

एलिसा हिल्लीले सजिलो क्याच लिन सकिनन्। त्यसपछि व्यक्तिगत १०६ रनमा जेमिमाको अर्को क्याच म्याक्ग्राले झारेकी थिइन्। त्यतिबेला भारतलाई जितका लागि ४१ बलमा ५५ रन आवश्यक थियो। यदि त्यो क्याच समातिएको भए खेलको नतिजा अर्कै हुन सक्थ्यो। तर यी दुई गल्तीले अस्ट्रेलियाको सपना त्यहीँ टुट्यो।

जेमिमा अन्त्यसम्म १३४ बलमा १२७ रन बनाएर अविजित रहिन्। उनको साथमा दीप्ति शर्माले १७ बलमा २४ रन, ऋचा घोषले १६ बलमा २६ रन र अमनजोत कौरले ८ बलमा १५ रन बनाए। अस्ट्रेलियाका लागि किम गार्थ र सान्डरल्यान्डले २–२ विकेट लिए।

यसअघि टस जितेर ब्याटिङ गर्न आएका अस्ट्रेलियाले ४९.५ ओभरमा सबै विकेट गुमाउँदै ३३८ रन बनाएको थियो। फोएबे लिचफिल्डले ९३ बलमा १७ चौका र ३ छक्कासहित ११९ रन, एलिसा पेरीले ८८ बलमा ६ चौका र २ छक्कासहित ७७ रन, र एश्ली गार्डनरले ४५ बलमा ४ चौका र ४ छक्कासहित ६३ रन बनाए। भारतका श्री चरणी र दीप्ति शर्माले २–२ विकेट लिएका थिए।

महिला एकदिवसीय क्रिकेटमा भारतले नयाँ रेकर्ड बनाएको छ। यो इतिहासमै सबैभन्दा ठूलो लक्ष्य पछ्याएर जित हो। यसअघि यही विश्वकपको समूह चरणमा भारतको ३३१ रनको लक्ष्य पछ्याउँदै अस्ट्रेलियाले रेकर्ड बनाएको थियो, जुन भारतले तोडेको छ।