अब झन् फिट छु : कोहली

काठमाडौं। २२३ दिनको लामो बिदा काट्दै भारतीय क्रिकेट स्टार विराट कोहली फेरि अन्तर्राष्ट्रिय क्रिकेटमा फर्किएका छन्।

च्याम्पियन्स ट्रफीको फाइनलपछि पहिलोपटक अन्तर्राष्ट्रिय खेल खेलेका कोहलीले आफ्नो लक्ष्य स्पष्ट पारेका छन्। टी–२० र टेस्ट क्रिकेटबाट सन्न्यास लिँदै उनले किन अब एक फर्म्याटमै ध्यान दिन लागेका हुन् भन्ने पनि खुलाएका छन्।

अस्ट्रेलियाविरुद्धको खेलअघि रवि शास्त्री र एडम गिलक्रिस्टसँगको अन्तर्वार्तामा कोहलीले भने,‘गत १५ वर्षमा मैले विश्वभर सबैभन्दा धेरै अन्तर्राष्ट्रिय क्रिकेट खेलेको छु।’

तर, अस्ट्रेलियामा उनको पुनरागमन सुखद् भएन। गत वर्ष उनले टी–२० विश्वकप जितेपछि उक्त फर्म्याटबाट सन्न्यास लिएका थिए। त्यसपछि यो वर्षको सुरुआतमा च्याम्पियन्स ट्रफीको उपाधि जिते र त्यसपछि इंग्ल्यान्डविरुद्धको टेस्ट सिरिजअघि टेस्ट क्रिकेटबाट पनि बिदा लिए। त्यसयता कोहली क्रिकेटबाट टाढै थिए।

केही महिनाको यो बिदा बारे बोल्दै उनले भने,‘जीवनको यस चरणमा आएर म परिवारभन्दा पेसालाई प्राथमिकता दिन चाहन्नँ। गत १५–२० वर्षमा मैले यति धेरै क्रिकेट खेलें कि वास्तविक अर्थमा आराम गर्ने मौका पाइनँ। सम्भवतः यो समयमा मैले सबैभन्दा धेरै अन्तर्राष्ट्रिय खेल खेलें, आइपीएलसहित। त्यसैले यो समय मेरो लागि फ्रेस हुने अवसर थियो।’

३६ वर्षका कोहलीको फिटनेसबारे धेरैले शंका गरेका थिए। तर, उनले स्पष्ट रूपमा भने,‘म अहिले जति फिट छु, सायद यसअघि कहिल्यै थिएन। अहिले मलाई जुन फ्रेस महसुस भइरहेको छ, त्यो आत्मविश्वासबाट आएको हो। म जान्दछु मैदानमा के गर्नुपर्छ। अहिले मेरो लागि सबैभन्दा महत्त्वपूर्ण कुरा शारीरिक तयारी हो, किनभने मानसिक रूपमा म तयार नै छु।’

उनले थपे,‘यो चरणमा आएर मैले बुझें, शरीर फिट रह्यो भने रिफ्लेक्स पनि ठीक रहन्छ। खेलको बोध त मेरो भित्रै छ। शरीरलाई त्यसअनुसार तयार पार्नुपर्छ, म त्यसै गर्छु। अहिले मलाई कुनै समस्या छैन। अस्ट्रेलियामा आएर ताजगी महसुस भइरहेको छ, नेटमा राम्रोसँग अभ्यास भइरहेको छ, फिल्डिङमा पनि हल्का र सक्रिय महसुस भइरहेको छ। सबै कुरा ठिकठाक छन्।’

तर, पुनरागमनको पहिलो खेलमा कोहलीको ब्याटबाट रन आएन। अस्ट्रेलियाविरुद्ध पहिलो एकदिवसीय खेलमा उनले सात बल खेल्दै शून्य रनमा आउट भए। त्यसपछि उनको वनडे करियरबारे पुनः प्रश्नहरू उठ्न थालेका छन्।