अस्ट्रेलियासँग भारतको लज्जास्पद हार

काठमाडौं। अस्ट्रेलियाले वर्षाले अवरुद्ध पहिलो एकदिवसीय खेलमा भारतलाई ७ विकेटले पराजित गरेको छ। योसँगै ३ खेलको सिरिजमा १–० को अग्रता लिएको छ। लगातार चारपटक वर्षाका कारण रोकिएको खेल अन्ततः २६–२६ ओभरमा छोट्याइएको थियो।

भारतले पहिले ब्याटिङ गर्दै २६ ओभरमा ९ विकेट गुमाउँदै १३६ रन बनाएको थियो। डकवर्थ–लुइस नियमअनुसार अस्ट्रेलियालाई १३१ रनको नयाँ लक्ष्य दिइएको थियो। जुन कप्तान मिचेल मार्शको सानदार प्रदर्शनमा २१.१ ओभरमा ३ विकेटको क्षतिमा पूरा गर्‍यो।

यो जितसँगै भारतको लगातार ८ एकदिवसीय जितको क्रम टुटेको छ। यस वर्ष भारतले पहिलोपटक एकदिवसीयमा हार बेहोर्नुपरेको हो। यो खेलमा भारत शुभमन गिलको कप्तानीमा खेलेको पहिलो एकदिवसीय थियो। तर, गिललाई कप्तानका रूपमा डेब्युमै हार हात पर्‍यो।

लक्ष्यको पछ्याउनेक्रममा मार्शले ५२ बलमा २ चौका र ३ छक्कासहित नटआउट ४६ रन बनाए। उनले जोश फिलिपसँग मिलेर टोलीलाई सहज जिततर्फ डोर्‍याए। अस्ट्रेलियाका लागि पहिलो विकेट ट्राभिस हेडको रूपमा खस्यो। उनलाई अर्शदीप सिंहले ८ रनमै आउट गरे। त्यसपछि अक्षर पटेलले मैथ्यु सर्टलाई पनि ८ रनमै पभेलियन पठाए।

फिलिपले ३७ रन बनाएपछि वाशिंगटन सुन्दरको बलमा आउट भए। अन्ततः मार्श र म्याट रेनशले नटआउट रहँदै टोलीलाई जित दिलाए। रेनशले २१ रन बनाए। भारतका लागि अर्शदीप, अक्षर र सुन्दरले १/१ विकेट लिए।

भारतका लागि यो खेलमा नितीशकुमार रेड्डीले एकदिवसीय डेब्यु गरे। अस्ट्रेलियाबाट रेनश र मिचेल ओवेनले पहिलो खेल खेले। भारतले पर्थमा भएको पहिलो खेलका लागि ३ तीव्र बलर र ३ अलराउन्डरसहित टोली बनाएको थियो।

भारतको कमजोर ब्याटिङ

चौथोपटक खेल सुरु हुँदा ओभर घटाइएर २६ ओभरमा सीमित गरियो। त्यसपछि केएल राहुलले केही आक्रामक ब्याटिङ गरे र स्कोर १०० पार गराए।

तर, ठूलो सट खेल्ने क्रममा उनी आउट भए। अन्त्यतिर डेब्यु खेलिरहेका नितीशले केही आकर्षक शर्ट खेले र टोलीलाई सम्मानजनक स्कोरमा पुर्‍याए। उनले ११ बलमा दुई छक्कासहित नटआउट १९ रन बनाए।

अस्ट्रेलियाका लागि म्याथ्यु कुह्नेम्यान, मिचेल ओवेन र जोश हेजलवुडले २/२ विकेट लिए। मिचेल स्टार्क र नाथन एलिसले १/१ विकेट लिए।