भारत र अस्ट्रेलियाविरुद्ध खेल्ने रोहितको इच्छा !

काठमाडौं। अपराजित यात्रा पूरा गर्दै नेपालले अन्ततः भारत र श्रीलंकामा हुने २०२६ को टी–२० विश्वकपमा स्थान पक्का गरेको छ।

एसिया एन्ड इस्ट एसिया प्यासिफिक क्षेत्रीय छनोटमा एकपटक पनि हार बेहोर्न नपरेको नेपालले अन्तिम खेलमा सामोआमाथि १२४ रनको फराकिलो जित निकालेपछि उत्सव मनायो।

तर, कप्तान रोहित पौडेलको मनमा अब अर्को सपना पलाएको छ, भारतमा गएर भारतसँग खेल्ने। खेलपछि अफिसियल ब्रोडकास्टले विश्वकपमा कुन टिमसँग खेल्न चाहनुहुन्छ भन्ने प्रश्न सोध्दा रोहितले मुस्कुराउँदै भने,‘भारतमा गएर भारतसँग खेल्न मन छ। अस्ट्रेलियाविरुद्ध पनि खेल्ने इच्छा छ।’ नेपालले सन् २०२३ मा भारतविरुद्ध पहिलोपल्ट प्रतिस्पर्धा गरेको थियो।

एसिया कपअन्तर्गत भएको खेलमा नेपाललाई १० विकेटले पराजित गर्दै भारतले आफ्नो बहादुरी देखाएको थियो। त्यसयता नेपाल उक्त मञ्चमा फर्किन सकेको छैन। तर, यसपल्ट शीर्ष स्थानमा रहेर टी–२० विश्वकप पुगेको नेपाललाई दोस्रोपल्ट भारतसँग खेल्ने मौका पनि जुर्न सक्छ।

नेपाली राष्ट्रिय क्रिकेट टोलीका मुख्य प्रशिक्षक स्टुअर्ट ल अस्ट्रेलियाकै पूर्व खेलाडी हुन्। उनकै प्रशिक्षणमा नेपालले फेरि विश्वकपमा आफ्नो स्थान सुरक्षित गरेको हो। अस्ट्रेलियाले भने सिधै स्थान बनाएको हो। यो टोलीले सन् २०२१ मा पहिलोपल्ट टी–२० विश्वकप जितेको थियो।

भारत भने गत वर्षको विजेता टोली हो। उसले सन् २००७ को पहिलो संस्करणको उपाधिसमेत उचालेको थियो। रोहित यी दुईका अलवा इङ्ल्यान्डले पनि राम्रो क्रिकेट खेलिरहेको बताउँछन्।

उनी भन्छन्,‘इङ्ल्यान्ड पनि अहिले निकै राम्रो गर्दैछ।’ स्मरण रहोस् इङ्ल्यान्ड पनि दुईपल्ट विश्वकप जित्ने दोस्रो टोली हो। इङ्ल्यान्डले सन् २०१० र २०२२ मा विश्वकप जितेको थियो।

यी दुई टोलीभन्दा अगाडि दुईपल्ट विश्वकप जितेर इतिहास भने वेस्ट इन्डिजले बनाएको थियो। यो टोलीले सन् २०१२ र २०१६ मा उपाधि उठाउँदै दुईपल्ट विश्वकप जित्ने पहिलो टोली बनेको थियो