सामोआलाई नेपालको विशाल लक्ष्य

काठमाडौं। नेपालले आईसीसी टी–२० विश्वकप एसिया तथा इस्ट एसिया प्यासिफिक छनोटमा सामोआविरुद्ध २१२ रनको विशाल योगफल खडा गरेको छ।

उत्कृष्ट प्रदर्शन गर्दै पहिलो ब्याटिङमा २० ओभरमा ४ विकेट गुमाएर २११ रन बनाएको हो।

यसअघि नै विश्वकपमा पुगिसकेको नेपालका लागि आसिफ शेखले सर्वाधिक ६९ रन बनाए। उनले ४१ बलमा ७ चौका र ४ छक्का प्रहार गरे।

दीपेन्द्रसिंह ऐरीले ३३ बलमा ४ चौका र २ छक्कासहित ५३ रनको इनिङ्स खेल्दै टोलीलाई ठूलो योगफलतर्फ उकासे।

अन्त्यतिर लोकेश बामले विस्फोटक ब्याटिङ गर्दै १२ बलमा ३९ रनको अविजित इनिङ्स खेले, जसमा ४ छक्का र २ चौका सामेल थिए।

कप्तान रोहित पौडेलले पनि १२ बलमा २१ रन जोडे भने कुशल भुर्तेलले १५ बलमा १७ रनको योगदान दिए।

सामोआका बलर डेरियस भिसरले २ विकेट लिए भने साउमानी टियाई र ड्यानियल बर्गेसले समान १ विकेट झारे।