कमनवेल्थ गेम्सका गोल्डमेडलिस्ट धावक जोन नेपालगन्जमा

नेपालगन्ज। विश्व खेलकुदमा ‘मिनी ओलम्पिक’ भनेर चिनिने कमनवेल्थ गेम्स २०१० का स्वर्णपदक विजेता केन्याली धावक जोन केलाई नेपालगन्ज आइपुगेका छन्। उनी धारा नेपालगन्ज म्याराथनको निमन्त्रणामा नेपालगन्ज आएका हुन्।

नेपालगन्ज विमानस्थलमा आयोजक समितिका संस्थापक टीएस ठकुरी, रेस डाइरेक्टर चन्द्रबहादुर गुरुङ र संस्थापक सदस्य भीम ओलीले लिजेन्ड धावक जोनलाई स्वागत गरे।

रेस डाइरेक्टर गुरुङका अनुसार केलाईले नेपालगन्ज म्याराथनकै भगिनी इभेन्ट ‘गौघाट ग्रीन रन’ मा अतिथि धावकका रूपमा सहभागिता जनाउने छन्। उनले स्कुले बालबालिकासँगै दौडेर उनीहरूको हौसला बढाउने कार्यक्रम रहेको छ।

धावक जोन केलाई सन् २००३ देखि २०१० सम्म विश्वका प्रतिष्ठित म्याराथनहरू मुम्बई म्याराथन (भारत), इन्सेद म्याराथन (नेदरल्याण्ड्स), टोरन्टो वाटरफ्रन्ट म्याराथन (क्यानडा), सिंगापुर म्याराथन, र ब्रसेल्स म्याराथन (बेल्जियम)का विजेता रहिसकेका छन्। उनलाई म्याराथन दौडको विज्ञ र लिजेन्डरी धावकको रूपमा मानिन्छ।