भारतविरुद्ध खेल्ने अस्ट्रेलियाको टोली घोषणा, दुई ठूला खेलाडी बाहिर

काठमाडौं। भारतविरुद्ध खेलिने वान डे र टी–२० सिरिजका लागि अस्ट्रेलियाले टोली घोषणा गरेको छ।

क्रिकेट अस्ट्रेलियाले घोषणा गरेको टोलीमा अनुभवी ब्याटर मार्नस लाबुशानेलाई वान डे टिमबाट बाहिर राखिएको छ भने चोटका कारण ग्लेन म्याक्सवेल टी–२० टोलीमा परेनन्।

अस्ट्रेलिया र भारतबीचको तीन वान डे र दुई टी–२० खेल अक्टोबर १९ देखि सुरु हुने तय भएको छ। दुवै फर्म्याटमा मिचेल मार्स कप्तान रहनेछन्।

लाबुशानेको ब्याटिङ फर्म पछिल्लो समय कमजोर रहँदै आएको छ। त्यसैले उनलाई वान डे टोलीबाट बाहिर राखिएको हो। उनको सट्टा म्याथ रेनशोलाई पहिलो पटक मौका दिइएको छ। १४ टेस्ट खेलिसकेका रेनशो अहिले आफ्नो पहिलो वान डे खेलको प्रतीक्षामा छन्।

रेनशोले पछिल्ला केही सिजनमा लिस्ट ‘ए’ क्रिकेटमा निरन्तर प्रदर्शन गर्दै छनोटकर्ताको ध्यान तानेका थिए। अस्ट्रेलिया ‘ए’ टोलीबाट श्रीलंकाविरुद्ध शतक प्रहार गरेर उनले आफ्नो क्षमताको परिचय दिएका थिए। वान डेमा उनी प्रायः तेस्रो वा चौथो नम्बरमा ब्याटिङ गर्छन्। सन् २०२१ पछि उनको औसत ४८.६८ छ।

उता, गत वर्ष नोभेम्बरपछि पहिलो पटक बायाँ हातका फास्ट बलर मिचेल स्टार्क वान डे टोलीमा फर्किएका छन्। तर, हातको चोट निको नभएकाले म्याक्सवेल टी–२० सिरिजमा हुने छैनन्। यसपटक क्यामरुन ग्रिन वान डे टोलीमा परे पनि टी–२० टिममा उनलाई स्थान दिइएको छैन।

भारत र अस्ट्रेलियाबीचको यो सिरिज आगामी विश्वकप तयारीको महत्त्वपूर्ण अभ्यास मानिएको छ। अस्ट्रेलियाले नयाँ खेलाडीलाई मौका दिँदै भविष्यका लागि टोली बलियो बनाउने संकेत पनि दिएको छ।

अस्ट्रेलियाको वान डे टोली :

मिचेल मार्स (कप्तान), जेभियर बार्टलेट, एलेक्स केरी, कुपर कोनोली, बेन डोर्शुइस, नाथन एलिस, क्यामरुन ग्रिन, जोस हेजलवुड, ट्राभिस हेड, जोस इंग्लिस, मिचेल ओवेन, म्याथ रेनशो, म्याथ सर्ट, मिचेल स्टार्क र एडम जाम्पा।

अस्ट्रेलियाको टी–२० टोली :

मिचेल मार्स (कप्तान), सीन एबट, जेभियर बार्टलेट, टिम डेविड, बेन डोर्शुइस, नाथन एलिस, जोस हेजलवुड, ट्राभिस हेड, जोस इंग्लिस, म्याथ कूनेमन, मिचेल ओवेन, म्याथ सर्ट, मार्कस स्टोइनिस र एडम जाम्पा।