आसिफ र सन्दीपको शतकीय साझेदारी, वेस्ट इन्डिजलाई प्रतिस्पर्धात्मक लक्ष्य

विश्वास थापा (युएई)। ओपनर आसिफ शेख र मध्यक्रमका सन्दीप जोराको शतकीय साझेदारीसँगै नेपालले वेस्ट इन्डिजविरुद्धको दोस्रो टी-२० आई खेलमा १७४ रनको प्रतिस्पर्धात्मक लक्ष्य प्रस्तुत गरेको छ।

संयुक्त अरब इमिरेट्स (युएई)स्थित शारजहा अन्तर्राष्ट्रिय क्रिकेट स्टेडियमा नेपालले टस जितेर पहिला ब्याटिङ थालेको थियो। नेपालले शेख र जोराको सानदार ब्याटिङसँगै नेपालले निर्धारित २० ओभरमा ६ विकेट गुमाउँदै १७३ रन बनाएको हो।

नेपालले खराब सुरुआत गरेको थियो। ओपनर कुशल भुर्तेल दुई, कप्तान रोहितकुमार पौडेल तीन र मध्यक्रमका कुशल मल्ल सात रनमा पेभिलियन फर्किएका थिए।

तर, ६.४ ओभरमा ३-४३ को स्थितिमा रहेको नेपाललाई बलियो अवस्थामा लैजान शेख र सन्दीपले १०० रनको साझेदारी गरे।

शेखले अविजित रहँदै सर्वाधिक ६८ रन बनाए। ४७ बल खेलेका उनले आठ चौका र दुई छक्का प्रहार गरेका हुन्। यस्तै, सन्दीपले ३९ बलमा तीन चौका र पाँच छक्कासहित ६३ रन बनाए। सन्दीपको यो करिअरकै एकै इनिङ्समा बनेको सर्वाधिक रन हो।

सन्दीप १७.४ ओभरमा आउट भए। त्यसपछि आएका गुलशनकुमार झा ६ र तीन वर्षपछि राष्ट्रिय टोलीमा फर्किएका मोहम्मद आदिल अन्सारी ११ रनमा आउट भए।

वेस्ट इन्डिजका कप्तान अकिल हुसैन र कायल मेयर्सले समान दुई विकेट लिए।