उत्कृष्ट लयमा पुलिसिच

काठमाडौं। आगामी वर्ष आफ्नै भूमिमा हुने विश्व कपअघि अमेरिकी स्टार क्रिस्टियन पुलिसिच उत्कृष्ट लयमा छन्। शनिबार सिरी ‘ए’ मा एसी मिलानले अपराजित उडिनेजलाई ३–० ले हराउँदा उनले दुई गोल गरे र अर्को गोलमा प्रत्यक्ष भूमिका खेले।

यो प्रदर्शन त्यही हो, जसलाई अमेरिकी समर्थकहरूले सन् २०२६ को विश्वकपमा देख्ने आशा गरेका छन्। अमेरिका, क्यानडा र मेक्सिकोले संयुक्त रूपमा आयोजना गर्ने विश्वकपमा पुलिसिच निर्णायक बन्न सक्ने विश्वास बढ्दै गएको छ।

हालैसम्म गोल्ड कप नखेल्ने विवादमा अड्किएका पुलिसिच र प्रशिक्षक मौरिसियो पोचेटिनोबीच पनि अब सबैकुरा समाधान भएको संकेत मिलेको छ।

सन् २०२३ मा मिलानमा आएका पुलिसिचले अहिलेसम्म १०५ खेलमा ३६ गोल र २१ असिस्ट गरेका छन्। यसको अर्थ उनले आधाभन्दा बढी खेलमा प्रत्यक्ष योगदान दिएका छन्। उनले भने,‘ट्रफी र खेल जित्नु मेरो लागि सबैभन्दा महत्त्वपूर्ण हो। गोल र असिस्ट आफैं आउँछन्।’

उडिनेजविरुद्ध उनले पहिलो गोल पहिलो हाफअघि रिबाउन्डमा गरे। दोस्रो हाफ सुरु भएको एक मिनेटमै उनको उच्च प्रेसिङका कारण युसुफ फोफानाले सहज गोल गर्न पाए।

अन्त्यमा उनले एड्रियन राबियोटको पासमा तेस्रो गोल पूरा गरे। यो जितसँगै मिलानले चार खेलमा तेस्रो जित निकाल्दै डिफेन्डिङ च्याम्पियन नापोलीसँग अंक बराबरी गरेको छ।

दुवै टोली शीर्ष स्थानमा रहेको युभेन्ट्सभन्दा एक अंकले मात्र पछाडि छन्। युभेन्ट्सको अपराजित यात्रा हेलास भेरोनासँग १–१ को बराबरीमा रोकिन पुगेको छ।

फिर्ता आएका प्रशिक्षक मासिमिलियानो अलेग्री निलम्बनकै कारण यो खेलमा उपस्थित थिएनन्। तर, अघिल्लो सिजन आठौं स्थानमा सीमित भएको मिलान यसपटक अझै सुधारिएको देखिएको छ। सात पटकको युरोपियन च्याम्पियन मिलान गत वर्ष महादेशीय प्रतियोगिताबाहिर रहन बाध्य भएको थियो।

यसैबीच नापोलीले सोमबार नयाँ प्रमोटेड टोली पिसासँग प्रतिस्पर्धा गर्नेछ।