जेभियर र ग्रिनफिल्डको विजयी सुरुआत
काठमाडौं। जेभियर इन्टरनेसनल कलेज र ग्रिनफिल्डले ग्लोबल हुप फेस्टअन्तर्गत अन्तरकलेज प्लस टु छात्र बास्केटबल प्रतियोगितामा शुक्रबार विजयी सुरुआत गरेका छन्।
सानागाउँस्थित रोयल स्पोर्ट्स सेन्ट्रलमा भएको खेलमा जेभियरले कान्जिरोवालाई ५८–३४ ले पराजित गर्यो। जेभियरको जितमा कुशल गुरुङले १२ अंक योगदान गरे। पहिलो क्वाटरमा ६–१२ ले पछि परेको जेभियरले बाँकीमा अग्रता बनाउदै जित सुनिश्चित गर्यो। जेभियरले दोस्रोमा २४–६, तेश्रोमा १४–८ र चौथोमा १४–८ स्कोर गर्यो।
सशान्त कार्कीको २१ अंक सहयोगमा ग्रिनफिल्डले गोल्डेनगेट इन्टरनेसनल कलेज ‘ए’ लाई ६३–५१ ले हरायो। पहिलो र दोस्रो क्वाटरमा १६–१५ र १८–११ को अग्रता लिएको ग्रिनफिल्ड तेस्रोमा ८–१३ ले पछि पर्यो। ग्रिनफिल्डले चौथो क्वाटरमा २१–१२ को स्कोर गर्दै जित निकाल्यो।
अबाइड ग्लोबल एजुकेसन कन्सल्टेन्सी प्रा.लि. को आयोजनामा भइरहेको प्रतियोगितामा बर्नहार्ट र प्रिमियरले पनि जितका साथ यात्रा प्रारम्भ गरे। बर्नहार्टले टाइम्स इन्टरनेसनल कलेजमाथि ५६–४६ को जित दर्ता गर्यो। बर्नहार्टका अनिश गुरुङले १७ अंक बटुले। बर्नहार्टले पहिलो क्वाटरमा २१–१५ र दोस्रोमा १२–१० को अग्रता लियो।
तेस्रो क्वाटरमा ११–१२ को झीनो अन्तरले पछि परेको बर्नहार्टले चौथोमा १२–९ को प्रदर्शन गर्यो। प्रिमियरले गोल्डेनगेट ‘बी’ लाई ५३–३० ले पाखा लगायो। प्रिमियरका अश्विन चालिसेले २१ स्कोर गरे। प्रिमियरले पहिलोमा २१–४ र दोश्रोमा ११–८ अंक जोडे। तेस्रो क्वाटर ११–११ को बराबरी भयो भने चौथोमा प्रिमियर १०–७ ले अगाडि रह्यो।
११ टिम सहभागी प्रतियोगिताको विजेताले २५ हजार र उपविजेताले १० हजार नगद पुरस्कार पाउने छन्। ‘मोस्ट भेलुएबल प्लेयर’ लाई ५ हजार नगदबाट पुरस्कृत गरिने छ
