आठौं रिएले कप : ड्राफ्टबाट १२० खेलाडी छनोट

काठमाडौं। आठौं रिएले कप– रिएले समर लिग २०२५ को ड्राफ्टबाट १२० खेलाडी छनोट भएका छन्। 

भक्तपुरको मध्यपुर ठिमी, बोडेस्थित रिएले ग्राउन्डमा शनिबार सम्पन्न ड्राफ्टबाट यु–१०, यु–१२ र यु–१४ उमेर समूहका गरी १२० खेलाडी (ब्वाइज र गर्ल्स) छनोट भएका हुन्।

आयोजक एफसी रिएलेका अनुसार कुल खेलाडी संख्याको ३० प्रतिशत स्थान निम्न आय वर्गका प्रतिभाशाली बालबालिकाका लागि आरक्षित गरिएको छ।

ड्राफ्टमार्फत सहभागी खेलाडीलाई नरसिंह, पुलुकीशी, भैरव, लाखे र कुमारी गरी पाँच आन्तरिक टिममा विभाजन गरिएको छ। हरेक टिममा तीनै उमेर समूहका टिम रहनेछन्। खेलहरू ६ भर्सेस ६ स्वरूपमा राउन्ड–रोबिनका आधारमा हुनेछ। 

लिगका उत्कृष्ट खेलाडी, गोलकिपर, उच्च गोलकर्ता र हरेक खेलका उत्कृष्ट खेलाडीलाई ट्रफी दिइने छ। सबै खेल बोडेस्थित रिएले ग्राउन्डमै हुनेछन्। टिमहरूले प्रशिक्षण लिनेछन् भने लिग खेलहरू हरेक शनिबार आयोजना हुनेछन्। कार्यक्रम चार हप्तासम्म चल्नेछ।

लिगको सुरुआत साउन ३१ बाट हुनेछ। उद्घाटन समारोहमा स्थानीय पूर्व र सिनियर खेलाडीबीचको मैत्रीपूर्ण खेल हुनेछ। एफसी रिएले जापानको गैर–नाफामूलक संस्था रिएले वर्ल्ड अन्तर्गतको परियोजना हो।

यसले फुटबलमार्फत बालबालिकाको शारीरिक, मानसिक र सामाजिक विकासमा काम गर्दै आएको छ। क्लबको पुरुष टिम सहिद स्मारक ‘सी’ डिभिजन लिग छनोटमा सहभागी हुँदै आएको छ भने महिला टिमले पहिलोपटक एन्फा महिला लिग छनोटमा सहभागी हुने लक्ष्य राखेको छ।

रिएले कप क्लबको युवा विकास कार्यक्रम अन्तर्गत हरेक वर्ष दुईपटक सञ्चालन हुन्छ। समर लिगमा व्यक्तिगत रूपमा दर्ता भएका खेलाडीलाई आन्तरिक ड्राफ्टमार्फत टिममा विभाजन गरिन्छ भने विन्टर लिगमा विभिन्न एकेडेमी, विद्यालय र बाह्य टिमबीच प्रतिस्पर्धा गराइन्छ। 

यस पहलले उपेक्षित ग्रासरुट र युवा फुटबललाई पुनर्जीवित गर्न महत्त्वपूर्ण योगदान पुर्याउँदै आएको छ। यस लिगलाई राष्ट्रिय टिमका कप्तान तथा गोलकिपर किरण चेम्जोङ र ‘ए’ डिभिजन लिगका सर्वाधिक गोलकर्ता सन्तोष साहुखलजस्ता खेलाडीहरूले पनि सहयोग गर्दै आएका छन्।