आठौं इन्टरस्कुल बास्केटबल प्रतियोगिता आजदेखि

काठमाडौं। आठौं इन्टरस्कुल बास्केटबल प्रतियोगिता शुक्रबार सुरु हुने भएको छ।

गोकर्णेश्वर–८, अत्तरखेलस्थित बौद्ध इन्टरनेशनल स्कुलको आयोजनामा प्रतियोगिता भदौ १ गतेसम्म सञ्चालन हुनेछ।

कोभिड–१९ महामारीका कारण दुई वर्ष रोकिएको प्रतियोगिता फेरि सुरु गर्न लागिएको हो। प्रतियोगितामा २५ वटा विद्यालय सहभागी छन्। तीमध्ये २१ ब्वाइज र १६ गर्ल्स टिम रहेका छन्।

प्रतियोगिता सन् २०१६ देखि सञ्चालन हुँदै आएको हो। गत संस्करणमा ब्वाइजतर्फ विल्सन एकेडेमी र गर्ल्सतर्फ एनसीसीएस विजेता भएका थिए।

प्रतियोगितामा विजेता र उपविजेता टोलीलाई ट्रफी, पदक र प्रमाणपत्र प्रदान गरिनेछ। साथै उत्कृष्ट खेलाडी, सबैभन्दा धेरै स्कोर गर्ने खेलाडी र अनुशासित टोलीलाई पनि सम्मान गरिनेछ।