काठमाडौं। इन्टर मियामीले बिहीबार बिहान मेक्सिकन क्लब पुमासलाई ३–१ ले पराजित गर्दै मेजर लिग सकर (एमएलएस) लिग्स कपको नकआउट चरणमा स्थान सुरक्षित गरेको छ।
खेलमा उरुग्वेयन स्टार लुइस सुआरेजले एक गोल र दुई असिस्ट गरे। इन्टर मियामीले कप्तान लिओनल मेसीबिनै खेल खेलेको थियो।
मेसीको दाहिने खुट्टाको मांसपेशीमा सानो चोट देखिएको क्लबले जनाएको छ। उनी अनिश्चितकालका लागि मैदानबाहिर रहनेछन्।
शनिबार नेकाक्साविरुद्धको खेलको सुरुआतमै उनी घाइते भएका थिए। यद्यपि, बुधबारको खेल हेर्न उनी चेज स्टेडियममा उपस्थित थिए। इन्टर मियामी अहिले लिग्स कप समूह चरणमा ८ अंकसहित एमएलएसको पहिलो टोलीका रूपमा नकआउट चरणमा पुग्न सफल भएको हो।
खेलको ३४औं मिनेटमा पुमासका जोर्ज रुभाल्काबाले अग्रता दिलाएका थिए। त्यसपछि ४५औं मिनेटमा अर्जेन्टिनी मिडफिल्डर रोड्रिगो डे पाउलले सुआरेजको पासमा गोल गर्दै स्कोर बराबरीमा ल्याए। यो डे पाउलको इन्टर मियामीका लागि पहिलो गोल हो।
पाउल हालै मेसीसँग खेल्न एमएलएस आएका हुन्। उनले गत गत बुधबार एटलासविरुद्ध डेब्यु गरेका थिए र नेकाक्साविरुद्ध दुई असिस्ट गरेका थिए।
५९औं मिनेटमा पेनाल्टी क्षेत्रभित्र पुमासका डिफेन्डर जोसे काइसेडोले ह्यान्ड गरेपछि इन्टर मियामीले पेनाल्टी पायो। त्यसमा सुआरेजले गोल गर्दै टोलीलाई २–१ को अग्रता दिलाए। यो सुआरेजको इन्टर मियामीका लागि जुन २३ मा पाल्मेरासविरुद्ध क्लब विश्वकप खेलमा गरेको गोलपछि पहिलो गोल हो।
६९औं मिनेटमा सुआरेजले दोस्रो असिस्ट गरे र टाडेओ अल्लेन्देले त्यसलाई गोलमा परिणत गर्दै खेलको अन्तिम स्कोर ३–१ बनाए।
