ब्रुनोको पेनाल्टी गोलमा युनाइटेडको जित

काठमाडौं। ब्रुनो फर्नान्डेजको पेनाल्टी गोलसँगै म्यानचेस्टर युनाइटेडले इङ्लिस प्रिमियर लिगमा पहिलो जित निकालेको छ।

ओल्ड ट्राफर्डमामा शनिबार सम्पन्न खेलमा घरेलु टोलीले बर्नेलीलाई ३–२ ले पाखा लगाएको हो। जितसँगै युनाइटेडले ३ खेलबाट ४ अंक पुर्‍याएको छ।

युनाइटेडलाई जित दिलाउन ब्रायन एमबेउमोले एक गोल थपे भने अर्को उपहारस्वरुप युनाइटेडलाई प्राप्त भएको थियो। बर्नेलीका लाइल फोस्टर र जैदोन एन्थोनीले गोल गरे।

खेलको २७औं मिनेटमा जोश कलेनको आत्मघाती गोलमार्फत युनाइटेडले सुरुआती अग्रता लिएको थियो। 

तर, ५५औं मिनेटमा लाइलले बर्नेलीलाई खेलमा फर्काए। उनले ब्रुन लार्सनको पासमा गोल गरेका हुन्। तर, त्यसको दुई मिनेटपछि नै डियागो डालोटले युनाइटेडलाई खेलमा फर्काउन मद्दत गरे।

उनको पासमा ब्रायनले अर्को गोल थपे। तर, ६६औं मिनेटमा एन्थोनीले गोल गरेपछि खेल २–२ मा पुगेको थियो।

तर, इन्जुरी समयको सातौं मिनेटमा कप्तान फर्नान्डेजले पेनाल्टीमार्फत गोल गर्दै युनाइटेडको जित पक्का गर्दिए।