काठमाडौं। भिनिसियस जुनियर र अर्दा गुलेरले लगातार दुई गोल गर्दै रियल मड्रिडलाई मलोर्कामाथि २–१ को जित दिलाएका छन्।
यससँगै शनिबार स्पेनिस लिगमा मड्रिड तीन खेलमै ब्याक–टु–ब्याक तीन जित दर्ता गर्न सफल भएको छ। सान्टियागो बेर्नाबेउ रंगशालामा भएको खेलमा प्रशिक्षक जाबी अलोन्सोको टोलीका तीन नयाँ खेलाडीहरूले महत्त्वपूर्ण योगदान पुर्याए।
मलोर्काले १८औं मिनेटमा अग्रता लियो। पाब्लो टोरेको कर्नर बलमा वेदात मुरिकीले डिन ह्युजसेनलाई छलेर खुट्टाको पछाडिबाट बल छोएर थिबोट कर्तोइसको गोलपोस्टभित्र पठाए।
तर, २० वर्षीय नयाँ डिफेन्डर ह्युजसेनले ३७औं मिनेटमा बराबरीमा भूमिका खेले। सेट पिसबाट आएको क्रसमा उनले हेडर गर्दै बल गोलपोस्ट अगाडि पुर्याए। उक्त बललाई गुलेरले फिनिसिङ गरे।
एक मिनेटमै भिनिसियसले स्कोर उल्टाए। मलोर्काले मध्य मैदानमा बल गुमाएपछि ब्राजिलियन फरवार्डले बल अघि बढाएर बायाँ खुट्टाबाट प्रहार गर्दै यस सिजनको दोस्रो गोल गरे।
दोस्रो हाफमा मलोर्काले बराबरी खोज्ने प्रयास गर्यो। सर्जी डार्दरले आक्रामक पास दिन खोज्दा जुनमा आएका ट्रेण्ट अलेक्जेन्डर–आर्नोल्डले स्लाइड गर्दै त्यसलाई विफल बनाए।
नयाँ लेफ्ट ब्याक आल्भारो करेरासले पनि स्यामु कोस्टाको प्रबल प्रहारलाई ब्लक गर्दै टोलीलाई जोगाए। यसअघि दुई खेलमै तीन गोल गरेका किलियन एमबाप्पेका दुई गोल अफसाइडका कारण रद्द भए।
अलेक्जेन्डर–आर्नोल्ड यसपटक राइट ब्याकमा सुरुआती ११ मा परेका थिए। अघिल्लो खेलमा दानी कार्भाहालले उनलाई विस्थापित गरेका थिए। दोस्रो हाफमा प्रिमियर लिगमा जान सक्ने चर्चा भइरहेको रोड्रिगोले भिनिसियसको स्थान लिएर मैदान प्रवेश गरे।
-1756657034.jpeg)
