काठमाडौं। दुई साता अघि नेपालले भुटानमाथि गोलको वर्षा गर्दै ठूलो जित निकाल्दा मुख्य प्रशिक्षक यामप्रसाद गुरुङ उत्साहित थिए।
साफ महिला यु–२० च्याम्पियनसिपमा भुटानलाई ६–१ र ८–० ले हराएको त्यो प्रदर्शनले उनलाई एएफसी महिला यु–२० एसियन कप छनोटमा पनि सहज जित निस्किनेमा आश्वस्त तुल्याएको थियो।
तर, चाम्लिमिथाङ रंगशालामा बुधबार भएको खेलले सबै अनुमानलाई उल्टायो। सुरुआती ४० सेकेन्डमै गोल गरेर अग्रता लिएको नेपालले भुटानसँग दोस्रोपटक १–१ बराबरी खेल्नु पर्यो।
खेलमा हार वा जित स्वभाविक हुन्छ। यस्तो अप्रत्याशित नतिजा आउनु पनि कुनै अचम्मको कुरा होइन। त्यसमाथि भुटानले नेपाललाई बराबरीमा रोकेको पहिलोपल्ट पनि थिएन। अझ त्यसमाथि भुटानको खेल नेपालकोभन्दा धेरै सुधार भएको देखियो।
तर, प्रशिक्षक यामप्रसादलाई यसलाई स्वीकार नै गर्न चहाँदैनन्। उनी यस्तो नतिजा निस्कनुमा लाइटको समस्या र भुटानले तीन जना सिनियर खेलाडी उतारेको कारण बताए।
‘अलिकति लाइटले समस्या गर्यो। अर्को कारण भनेको भुटानको सिनियर टोलीबाट खेलेका तीन खेलाडी मैदानमा थिए। त्यसले हामीलाई खेल्न असहज भयो,’ उनले भने।
तर, फुटबलमा यो बहाना पूर्ण रूपमा स्वीकार्य छैन। किनकि साफमा पनि राति खेल हुँदा यही टोलीका खेलाडीलाई फ्लड लाइटको कुनै समस्या थिएन।
उक्त खेलमा मीना देउवाको ह्याट्रिकसँगै नेपालले ६–१ को फराकिलो जित निकालेको थियो। तर, दुई साता पछि फरक केही थियो भने त्यो नेपालको मानसिक तयारी र रणनीतिक नेतृत्वको कमी हो।
खेलको ४० सेकेन्डमै सेनु परियारले गोल गरेपछि भुटानले तुरुन्तै आफ्नो खेलको गति र शैली परिवर्तन गर्यो। तर, नेपालले त्यस परिवर्तनको सामना गर्न सकेन र अझ दबाब महसुस गर्न थाल्यो।
खेलको सुरुआतमै खुलेको मिडफिल्डमा पासिङ र ड्रिब्लिङको अभाव देखियो। समन्वयपूर्ण आक्रमणका कुनै स्पष्ट योजना देखिएन। यसमा ‘प्लान बी’ को अभाव देखियो। त्यसले नेपाललाई कमजोर बनायो।
१८औं मिनेटमा भुटानी केल्जेङ वाङ्जोमले बराबरी गोल गरेको बेला नेपाली गोलकिपर अनावश्यक रूपमा धेरै अगाडि थिइन्। यसले सजिलै विपक्षीलाई गोल गर्न मौका दियो। यस्तो त्रुटिले टोलीको आत्मविश्वासमा थप चोट पुर्यायो।
अत्याधिक मिसपास, कमजोर दबाब र खराब निर्णयहरूले टोलीलाई निरिह बनायो। यस्तो देख्दा खेलाडी मात्र होइन, प्रशिक्षकको रणनीति र खेल व्यवस्थापनमा ठूलो कमजोरी छ भन्ने प्रष्ट हुन्छ।
नेपालका प्रशिक्षकले खेलको दबाब बढ्दा रणनीतिक रूपमा कुनै विकल्प प्रस्तुत गर्न सकेन। यसको अर्थ नेतृत्वमा सक्रियता र ऊर्जा कमी छ भन्नु नै हो। विपक्षी टोलीको बल र शैली बुझ्न नसक्नु, खेलाडीको क्षमता अनुसार रणनीति निर्माण गर्न नजान्नु अहिलेको नेपाली टोलीको मुख्य चुनौती हो।
त्यसैगरी, भुटानी टोलीले आफ्नो खेलमा सुधार गर्दै आक्रमण, डिफेन्स र फिटनेसमा ठूलो प्रगति गरेको देखियो। उनीहरूले नेपाली स्टार मिडफिल्डरहरूलाई खेल्न पनि कम अवसर दिएका थिए। यदि फिनिसिङमा सुधार आउँथ्यो भने स्कोर फराकिलो फरक हुन सक्थ्यो। तर, धन्न नेपाली डिफेन्डरले खेल नियन्त्रणमा लिए।
अब नेपाललाई योभन्दा बलियो टोली उत्तर कोरियासँग यस्तो कमजोरीले ठूलो परिणाम दिन सक्छ। तर, यामप्रसाद अझै भन्दैछन्,‘अलिकति मिहिनेत गर्नुपर्ने देखियो। त्यो गर्यौं भने छनोट हुने सम्भावना अझै कायमै छ!’
