भुटानसँग बराबरी खेलेपछि प्रशिक्षक भन्छन्– लाइटले समस्या गर्‍यो !

काठमाडौं। ‘भुटान र साउदी अरबलाई हराउँछौं। उत्तर कोरियासँग ड्र गरेर एसियन कप पुग्छौं,’ एएफसी महिला यु–२० एसियन कप छनोट प्रतियोगिता सुरु हुनुअघि मुख्य प्रशिक्षक यामप्रसाद गुरुङको लक्ष्य यही थियो।

तर, पहिलो खेलमै उनको रणनीतिमा धक्का मात्रै होइन, छनोटको सम्भावना पनि कमजोर बनेको छ। भुटानलाई फराकिलो अन्तरले हराउँदै छनोटमा बलियो सुरुआत गर्ने योजना बुनेको नेपाल १–१ को बराबरीमा रोकियो। यो उमेर समूहमा भुटानको ऐतिहासिक नतिजा हो।

बंगलादेशको ढाकामा दुई साता अघि सम्पन्न साफ महिला यु–२० च्याम्पियनसिपमा देखिएको नेपाली दबदबा योपटक दोहोरिएन। नेपालले खेलको पहिलो मिनेटमै अग्रता लिएको थियो। 

खेल सुरु भएको ४० सेकेन्डमै सेनु परियारले प्रतियोगिताकै सबैभन्दा छिटो गोल गर्दै नेपाललाई अग्रता दिलाएकी थिइन्। सुक्रिया मियाको क्रसलाई रोक्न खोज्दा भुटानी गोलकिपरको त्रुटि भएको थियो, जसको फाइदा उठाउँदै सेनुले सहज गोल गरिन्।

तर, त्यो लय नेपाली टोलीले जोगाउन सकेन। खेलको १८औं मिनेटमा भुटानकी केल्जेङ वाङ्जोमले बराबरी गोल फर्काइन्। नाम्सेल वाङ्जोमको क्रसमा नेपाली डिफेन्डरलाई बिट गर्दै उनले बल खाली पोस्टमा पठाएकी थिइन्। 

उक्त समयमा नेपाली गोलकिपर लिला जोशी पोस्टबाट निकै अगाडि आएकी थिइन्, जसले विपक्षीलाई गोल गर्न सजिलो बनायो। नेपालका लागि यो बराबरी निराशाजनक मात्रै हैन, चुनौतीपूर्ण समूहमा पराजयसरहको नतिजा पनि हो। 

किनभने अब नेपालले साउदी अरब र साबिक विजेता उत्तर कोरियासँग खेल्न बाँकी छ। कोरियाले आफ्नो पहिलो खेलमा साउदी अरबलाई १५–० ले हराएर शीर्ष स्थानमा रहन सफल भएको छ। नेपाल र भुटानले समान १ अंक बटुलेका छन्।

खेलपछि नेपाली टोलीका मुख्य प्रशिक्षक गुरुङले आफ्ना खेलाडीहरूले भुटानलाई हल्का रूपमा लिएको स्वीकार गरे। ‘अलिकति त लाइटले पनि समस्या गर्‍यो। अर्को कुरा साफको नतिजा हेरेर हामी सजिलै जित्छौं जस्तो लागेको थियो। तर, सहज तरिकाले लिएकोले बराबरीमा रोकियौं,’ उनले खेलाडीलाई दोष थुपारे।

नेपाली टोलीले पहिलोपल्ट फ्लड लाइटमा खेलेको होइन। साफमा दुई हप्ता अगाडि मात्रै नेपालले ६ मध्ये चार खेल बेलुकाकीको समयमा खेलेको थियो। त्यसमा भुटानविरुद्धको ६–१ को जित पनि समावेश छ। यही टोलीले यसपल्ट भुटानविरुद्ध खेलेको हो।

अब नेपालको छनोट हुने सम्भावना अंक गणितिय मात्रै बाँकी छ। साउदी अरबलाई फराकिलो अन्तरले हराए पनि उत्तर कोरियाले भुटान र नेपालसँग हार बेहोर्नुपर्छ। अर्कोतर्फ भुटानको नतिजा पनि नेपालको लक्ष्यमा बाधक बन्न सक्छ। यस्तोमा खेल अगाडि नै अत्याधिक आत्मविश्वासी बनेका गुरुङको अनुहारमा त्यो चमक हराइसकेको छ।

अब उनी आफैं हरेस खाँदै भन्छन्, ‘अब त छनोट हुन हामीलाई गाह्रो भइसक्यो। झनै राम्रो टिमसँग खेल्नुपर्छ। मिहिनेत अझै बढाउनु पर्नेछ।’

भुटानसँगको बराबरीले नेपाली टोलीलाई चेतावनी दिएको छ। त्यो भनेको इतिहासमा हेरेर वर्तमानमा जितिदैन। मैदानमा जति आत्मबल, त्यति नै सावधानी आवश्यक छ। अब नेपालका लागि हरेक खेल ‘फाइनल’ साबित हुनेछन्।