काठमाडौं। प्रिमियर लिग क्लब चेल्सीले फ्रेन्च डिफेन्डर ममाडु सारलाई आगामी लिग १ सिजनका लागि पुनः स्ट्रासबर्गमा ऋणमा पठाएको छ।
फ्रेन्च क्लब स्ट्रासबर्गले शुक्रबार आफ्नो वेबसाइटमार्फत ऋण सम्झौता गर्दै सारलाई भित्र्याएको पुष्टि गरेको हो। सार जुन महिनामा चेल्सीमा अनुबन्धित भएका थिए।
स्ट्रासबर्ग क्लब चेल्सीको मालिक टड बोहेली र क्लियरलेक क्यापिटलको नेतृत्वमा रहेको समूह (ब्लूको) अन्तर्गत रहेको छ, जसले २०२२ मा चेल्सी र २०२३ मा स्ट्रासबर्ग किनेको थियो।
१९ वर्षे सार फ्रान्सको यु–२० राष्ट्रिय टोलीका नियमित खेलाडी हुन्। उनी गएको सिजन स्ट्रासबर्गको लागि लिग १ मा २७ खेल खेलेका थिए। उनले पहिले लियोनबाट पनि केही खेल खेलेका थिए। स्ट्रासबर्गले अघिल्लो सिजन सातौं स्थानमा रहँदै कन्फरेन्स लिग प्लेअफमा स्थान बनाएको थियो।
चेल्सीले गत सिजन युइएफए कन्फरेन्स लिग जित्दै प्रिमियर लिगमा चौथो स्थानमा रहँदै च्याम्पियन्स लिगको स्थान बनाएको थियो। क्लबका अनुसार सारले २०३३ सम्मको दीर्घकालीन सम्झौतामा हस्ताक्षर गरेका छन्, तर ट्रान्सफर शुल्क भने सार्वजनिक गरिएको छैन।
स्ट्रासबर्गले आगामी सिजनको लिग सुरुवात अगस्ट १७ मा मेट्जविरुद्धको खेलबाट गर्नेछ।
-1756657034.jpeg)
