काठमाडौं। भारतीय राष्ट्रिय फुटबल टिमको मुख्य प्रशिक्षक पदका लागि बार्सिलोना कप्तान तथा पूर्वप्रशिक्षक जाभी हर्नान्डेजले आवेदन दिएको भन्ने हल्ला झुटो भएको प्रमाणित भएको छ।
अखिल भारतीय फुटबल महासंघ (एआईएफएफ) ले शनिबार एक विज्ञप्ति जारी गर्दै जाभी र म्यानचेस्टर सिटीका प्रशिक्षक पेप ग्वार्डिओलाका नामबाट प्राप्त आवेदनहरू नक्कली भएको पुष्टि गरेको हो।
‘हामीलाई जाभी र ग्वार्डिओलाको नाममा इमेलमार्फत आवेदन प्राप्त भएका थिए, तर ती दुवै नक्कली ठहरिएका छन्,’ एआईएफएफको भनाइ छ।
भारतीय राष्ट्रिय टोली डाइरेक्टर सुब्रत पालले यसअघि जाभीले भारतको टिम प्रशिक्षणका लागि आवेदन दिएको कुरा सत्य रहेको दाबी गरेका थिए।
जाभी गत जुन २०२४ मा बार्सिलोनाबाट बर्खास्त भएको यता कुनै टिमसँग आबद्ध छैन। उता ग्वार्डिओला सिटीसँग सन् २०२७ सम्मको अनुबन्धमा छन्।
भारतले हालै मात्रै स्पेनिस प्रशिक्षक मानोलो मार्क्वेजसँग पारस्परिक सहमतिमा सम्बन्ध विच्छेद गरेको छ। मार्क्वेजको कार्यकालमा भारतले ८ खेलमा १ जित निकालेको थियो।
महासंघले हालसम्म १७० भन्दा बढी आवेदन प्राप्त भएको र तीमध्येबाट तीन जना अन्तिम सूचीमा परेको जानकारी दिएको छ। तर, ती तीन जनाको नाम भने खुलाइएको छैन।
