काठमाडौं। हिमालयन जाभा बास्केटबल लिग (एचजेबिएल) अन्तर्गत बिहीबार भएको खेलमा कीर्तिपुर बास्केटबल क्लबले रोयललाई ९३–८७ ले पराजित गरेको छ।
यस खेलपछि लिग चरणका सबै ३० खेल सकिएका छन्। अब फाइनल र तेस्रो स्थानका लागि भिड्ने टिमको समीकरण तयार भएको छ।
यस जितले कीर्तिपुर लिगमा चौथो स्थानमा उक्लेको छ। अब कीर्तिपुरले तेस्रो स्थानको लागि प्लेअफमा हाउण्ड्स एकेडेमीसँग खेल्नेछ। शीर्ष दुईमा रहेका गोल्डेनगेट बास्केटबल क्लब र टाइम्स बास्केटबल क्लबले फाइनल खेल्नेछ।
लिगमा १० खेलबाट कीर्तिपुर र रोयलले समान १३ अंक जोडेपनि हेड टु हेडमा कीर्तिपुर अघि रहेको हो। यसअघि लिगमा रोएलले कीर्तिपुरले ९९–९६ अंकले पराजित गरेको थियो।
कीर्तिपुर कभर्डहलमा भएको खेलमा कीर्तिपुरले रोयलविरुद्ध पहिलो क्वाटरमा २७–२२ को अग्रता बनाएको थियो। दोस्रो क्वाटर रोएलले २२–२१ ले आफ्नो पक्षमा पारेपछि हाफटाइमसम्म कीर्तिपुर ४८–४४ ले अघि रह्यो। तेस्रो क्वाटर २७–२१ ले आफ्नो पक्षमा पारेपछि कीर्तिपुरले ७५–६५ को अग्रता बनायो।
चौथो तथा अन्तिम क्वाटर रोयलले २२–१८ ले आफ्नो पक्षमा पारेको थियो। तर कीर्तिपुरलाई जितबाट रोक्न सकेन। कीर्तिपुरका निश्चल महर्जन मोस्ट भ्यालुएबल प्लेअर घोषित भए।
रोयलका प्रसाङ मास्केले सर्वाधिक ३४ अंक जोडेपनि जितका लागि पर्याप्त भएन। कीर्तिपुरका सयुन राईले २६ अंक स्कोर गरे। फाइनल खेल र तेस्रो स्थानका लागि प्लेअफ खेल आगामी असार ७ गते हुने नेपाल बास्केटबल संघले जनाएको छ।
-1749816939.jpeg)
