२५ वर्षपछि जर्मनीमाथि ऐतिहासिक जित निकाल्दै पोर्चुगल फाइनलमा

काठमाडौं। क्रिस्टियानो रोनाल्डोको कप्तानीमा रहेको पोर्चुगलले २५ वर्षपछि जर्मनीमाथि ऐतिहासिक जित निकालेको छ।

४० वर्षीय रोनाल्डोले म्युनिखमा बुधबार सम्पन्न नेसन्स लिगको सेमिफाइनलमा जर्मनीविरुद्ध पोर्चुगललाई २–१ को जित दिलाए। उनले आफ्नो १३७औं अन्तर्राष्ट्रिय गोल पूरा गरेका छन्।

पोर्चुगलले जर्मनीको भूमिमा पछिल्लोपल्ट सन् १९८५ को अक्टोबरमा भएको विश्वकप छनोट खेल जित हासिल गरेको थियो। यो त्यही समय थियो, जुन बेला रोनाल्डो मडेइरामा जन्मिएका थिए।

२२० औं खेल खेल्दै कीर्तिमानी कायम गरेका रोनाल्डो जर्मनीविरुद्ध गोल गर्ने सबैभन्दा जेठा खेलाडी बने। यसअघि उनले जर्मनीविरुद्ध खेलेका पाँचै खेलमा पराजय भोगेका थिए। पोर्चुगलले अन्तिमपटक युरो २००० मा सर्जियो कन्सेसेओको ह्याट्रिकको मद्दतले जर्मनीलाई ३–० ले पराजित गरेको थियो।

बुधबारको खेलमा कन्सेसेओका छोरा फ्रान्सिस्को कन्सेसेओले मैदान छिरेको ५ मिनेटमै गोल गरे। खेलको ४८औं मिनेटमा फ्लोरियन विर्ट्जले जर्मनीलाई हेडरमार्फत अग्रता दिलाएका थिए। तर, पोर्चुगलका प्रशिक्षक रोबर्टो मार्टिनेजले कन्सेसेओ र च्याम्पियन्स लिग विजेता भिटिन्हालाई मैदानमा पठाउँदै खेलको मोड नै परिवर्तन गरे।

भिटिन्हाले सानदार खेल प्रस्तुत गरे। चार दिनअघि उनले यही रंगशालामा पेरिस सेन्ट–जर्मेनका लागि च्याम्पियन्स लिग फाइनल जिताएका थिए। जर्मनीका गोलकिपर मार्क–आन्द्रे टेर स्टेगेनले थप गोल हुन नदिन उत्कृष्ट बचाउ गरे।

‘हामी १०० प्रतिशत छैनौं भने शीर्ष टोलीसँग प्रतिस्पर्धा गर्न सक्दैनौं,’ जर्मनीका प्रशिक्षक जुलियन नागेल्सम्यानले भने। जर्मनीको टोलीमा जमाल मुसियालालगायत केही खेलाडी अनुपस्थित थिए।

पोर्चुगलका लागि पीएसजीका विन्गब्याक जोआओ नेभेस र नुनो मेन्डेसले सुरुआत गरे। जर्मनीका लागि स्टुटगार्टका निक वोल्टेमाडेले डेब्यु गरे। उनले पहिलो हाफमा सबैभन्दा राम्रो मौका पाए, तर पोर्चुगलका गोलकिपर डियोगो कोष्टाले बचाए।  

कन्सेसेओले ६३औं मिनेटमा गोल गरे। त्यसको ५ मिनेटमै नुनो मेन्डेसको क्रसमा रोनाल्डोले सजिलै गोल गर्दै पोर्चुगललाई अग्रता दिलाए। ‘गोल अझ बढी हुन सक्थ्यो,’ मेन्डेसले भने।

अब अर्को सेमिफाइनलमा बिहीबार फ्रान्स र स्पेनबीच स्टुटगार्टमा प्रतिस्पर्धा हुनेछ। जर्मनीले तेस्रो स्थानको खेलमा पराजित टोलीसँग खेल्नेछ।