पैसा नरोजेका फर्नान्डेस

काठमाडौं। म्यानचेस्टर युनाइटेडका कप्तान ब्रुनो फर्नान्डेसले साउदी क्लब अल–हिलालबाट आएको आकर्षक प्रस्ताव अस्वीकार गरेका छन्। 

फर्नान्डेसले भनेका छन्, ‘म अझै पनि सबैभन्दा उच्च स्तरमा फुटबल खेल्न चाहन्छु।’ युनाइटेडले अपेक्षाभन्दा कमजोर सिजनपछि फर्नान्डेसलाई रियादस्थित क्लबले अनुबन्धको प्रस्ताव गरेको हो।

उनले यो कुरा मंगलबार पुष्टि गरेका हुन्। तर, उनले क्लब, प्रशिक्षक र आफ्नो परिवारसँग छलफल गरेपछि उक्त प्रस्ताव अस्वीकार गरेका हुन्।

‘उनीहरूले मलाई सोच्न समय दिए। मैले भनेको थिएँ म्यानचेस्टर युनाइटेडले मलाई जान दिन्छ भने मात्र म जान तयार हुन्छु,’ फर्नान्डेसले अनुवादकमार्फत भने, ‘मैले प्रशिक्षक रुबेन अमोरिमसँग कुरा गरें, उनले मलाई नजान अनुरोध गरे। त्यसपछि मैले युनाइटेडसँग कुरा गरें। क्लबले मलाई बेच्न नचाहेको बतायो। यदि म जान चाहन्थें भने जान सक्थें। तर, युनाइटेडलाई पैसामा बिक्न र खेलाडी बेच्न आवश्यक थिएन।’

मिडिया रिपोर्टअनुसार अल–हिलालले ३० वर्षीय फर्नान्डेसलाई लिन १०० मिलियन पाउन्ड (करिब १८ अर्ब नेपाली रुपैयाँ) तिर्न तयार भएको थियो। यस्तै, प्रतिहप्ता ७ लाख पाउन्ड तलब दिने प्रस्ताव गरिएको थियो। क्लब यसै महिनाको क्लब विश्वकपमा पनि प्रतिस्पर्धा गर्दैछ।

‘यो साँच्चिकै उत्साहजनक प्रस्ताव थियो,’ फर्नान्डेसले भने, ‘अल– हिलालका अध्यक्ष निकै सम्मानजनक व्यवहार गर्ने व्यक्ति हुन्। उनले मेरो मेनेजरसँग कुरा गरे। तर, त्यसपछि मैले श्रीमतीसँग कुरा गरें। उनले मलाई सोधिन्—तिमी भविष्यमा के गर्न चाहन्छौ?’

फर्नान्डेसले गत वर्ष युनाइटेडसँग सन् २०२७ सम्मको सम्झौता नवीकरण गरेका थिए। हालै सम्पन्न सिजन युनाइटेडको लागि निराशाजनक रह्यो। क्लब प्रिमियर लिगमा १५औं स्थानमा रह्यो र च्याम्पियन्स लिगमा छनोट हुन असफल भयो। साथै युरोपा लिगको फाइनलमा टोटनह्यामसँग हार भोग्नु पर्‍यो।

‘हामीसँग लक्ष्य थिए। तर, पूरा गर्न सकेनौं,’ फर्नान्डेसले भने। रियाद जान उनको परिवारलाई सजिलो हुने थियो। विशेषतः पोर्चुगलका दुई खेलाडी रुबेन नेभेस र जोआओ क्यान्सेलो पनि अल–हिलालमै खेलिरहेका छन्।

‘उनीहरूसँग म अभ्यस्त छु। तर, म अझै उच्च स्तरमा र ठूला प्रतियोगिताहरूमा खेल्न चाहन्छु। मलाई थाहा छ, म अझै सक्षम छु। मेरो जीवन, भविष्य, फुटबलप्रतिको भावनाले गर्दा म यो निर्णयबाट सन्तुष्ट छु,’ उनले भने।

फर्नान्डेस पोर्चुगलको टोलीमा छन्। पोर्चुगलले बुधबार म्युनिखमा जर्मनीसँग नेसन्स लिगको सेमिफाइनल खेल्दैछ। विजेता टोलीले आइतबारको फाइनलमा फ्रान्स वा स्पेनसँग प्रतिस्पर्धा गर्नेछ।