एमबाप्पेको सन्देश– बधाई छ पिएसजी !

काठमाडौं। अब केलियन एमबाप्पेले ला लिगा क्लब रियल मड्रिडको जर्सीमा खेल्छन्। तर, आफ्नो पुरानो क्लब पेरिस सेन्ट–जर्मेन (पिएसजी)लाई उनले अझै बिर्सिन सकेका छैनन्।

सात सिजन खेलेको त्यो क्लबले पहिलोपटक युइएफए च्याम्पियन्स लिग जित्दा एमबाप्पे सबैभन्दा पहिला बधाई दिने पूर्व खेलाडीहरूमध्ये एक बने।

इन्टर मिलानमाथि ५–० को सानदार जितपछि म्युनिखमा ट्रफी उचालेको पिएसजीलाई एमबाप्पेले इन्स्टाग्राममार्फत एक भावुक सन्देश पठाएका हुन्। उनले च्याम्पियन्स लिग ट्रफीको फोटो सेयर गर्दै लेखे, ‘ठूलो दिन अन्ततः आइपुग्यो। त्यो जित पनि पुरै क्लबको शैलीमा! बधाई छ पिएसजी।’

एमबाप्पेले पिएसजी छाडेको एक सिजन मात्रै भएको छ। सन् २०१७ मा मोनाकोबाट पिएसजी आएका उनी ३०८ खेलमा २५६ गोल र १०८ असिस्ट गर्दै क्लबको इतिहासमै सर्वाधिक गोलकर्ता बने। उनले एडिन्सन काभानीलाई समेत यो कीर्तिमानमा उछिनेका थिए। 

उनले पिएसजीबाट ६ लिग वान, ४ फ्रेन्च कप, २ लिग कप र ३ सुपर कप जिते। तर, च्याम्पियन्स लिग जित्ने उनको सपना भने सधैं अधूरो बनेको थियो। सन् २०२० मा उनी र क्लब दुवै यो उपाधिनजिक पुगेका थिए। तर, फाइनलमा बायर्न म्युनिख बाधक बन्दियो।

त्यसयता पिएसजीले त्यो सफलता दोहोर्‍याउने प्रयास नगरेको होइन। जति गर्दा पनि सेमिफाइनलबाट माथि उठ्न नसकेपछि हार खाँदै एमबाप्पे यसै सिजन च्याम्पियन्स लिग जित्न विश्वकै सबैभन्दा सफल क्लब रियलमा अनुबन्ध भएका थिए।

तर, उनी गएको सिजन नै १५ पल्टको च्याम्पियन्स लिग विजेता रियल क्वार्टरफाइनलबाट अगाडि बढ्न सकेन। त्यतिमात्रै होइन, रियलले उपाधिविहीन हुँदै यस सिजन समाप्त गरेको छ।

यद्यपि, उनले चाहेको सफलता रियलबाट पूरा हुन सकेन। तर, त्यो अधूरो सपना पिएजीले भने क्लब करियरको ५४ वर्षमा पूरा गर्न सफल भएको छ। यही क्षणमा एमबाप्पेले रियलबाट पनि भावनात्मक बन्धनको झल्को दिएका छन्।

उनको सन्देशले स्पष्ट देखाएको छ, जर्सी फेरिए पनि पिएसजीसँगको सम्बन्ध फेरिएको छैन।