हाउन्ड्स र टाइम्स विजयी

काठमाडौं। हाउन्ड्स एकेडेमी र टाइम्स बास्केटबल क्लबले हिमालयन जाभा बास्केटबल लिग (एचजेबीएल) मा शनिबार जित हात पारेका छन्। 

कीर्तिपुर कभर्डहलमा भएको खेलमा हाउन्ड्सले रोयललाई १०२–९२ जे पराजित गरेको हो। यो जितपछि हाउन्ड्स ८ खेलबाट १५ अंक जोडेर शीर्ष स्थानमा उक्लेको छ। समान खेलबाट १० अंकसहित चौथो स्थानमा छ। 

खेलको पहिलो क्वाटरमा हाउन्ड्स र रोयल दुवैले समान २५ अंक जोडेका थिए। दोस्रो क्वाटरमा २७–२१ को अग्रता लिँदै हाउन्ड्सले हाफ टाइमसम्म ५२–४६ को अग्रता बनाएको थियो। तर तेस्रो क्वाटर रोयलले २५–२३ ले आफ्नो पक्षमा पार्दै खेलमा फर्कनले संकेत गरेको थियो। 

चौथो क्वाटरअघिसम्म हाउन्ड्सले ७५–७१ को अग्रता बनाएको थियो। चौथो तथा अन्तिम क्वाटर २७–२१ ले आफ्नो पक्षमा पारेपछि हाउन्ड्सले सहजै खेल जित्यो। 

खेलमा रोयलका लागि प्रसङ मास्केले सर्वाधिक ३७ अंक स्कोर गरे पनि जिताउन सकेनन्। हाउन्ड्सका लागि विजय बुर्जाले ३० अंक स्कोर गरे। 

हाउन्ड्सका उजेन नोर्वु गुरुङ मोस्ट भ्यालुएबल प्लेअर घोषित भए। पहिलो खेलमा टाइम्सले कीर्तिपुरमाथि एक अंकको रोमाञ्चक जित हात पारेको छ। 

कीर्तिपुरका निश्चल महर्जन एक्लैले ४३ अंक जोडेपनि टाइम्सले कीर्तिपुरलाई ९१–९० ले पराजित गरेको हो। अन्तिम क्वाटरमा कीर्तिपुरले सानदार पुनरागमन गरे पनि जितसम्म पुग्न सकेन।

टाइम्सका लागिमोस्ट भ्यालुएबल प्लेअर बनेका सदिश प्रधानले २७ अंक स्कोर गरे। टाइम्सले पहिलो क्वाटरमा २९–११ को अग्रतासहित सानदार सुरुवात गरेको थियो। दोस्रो क्वाटरमा दुवैले समान २६ अंक जोड्दा टाइम्सले हाफ टाइमसम्म ५५–३७ को अग्रता बनाएको थियो। 

तेस्रो क्वाटर कीर्तिपुरले २५–२२ ले आफ्नो पक्षमा पारे पनि अन्तिम क्वाटरअघि टाईम्सले ७७–६२ को राम्रो अग्रता लिएको थियो। तर चौथो तथा अन्तिम क्वाटरमा कीर्तिपुरले घरेलु दर्शकको समर्थनमा सानदार प्रदर्शन टाइम्सलाई टक्कर दिएको थियो। अन्तिम क्वाटर कीर्तिपुरले २८–१४ ले आफ्नो पक्षमा पारे पनि खेल जित्न भने सकेन। 

जितपछि टाइम्सले ८ खेलबाट १३ अंक जोडेको छ र तेस्रो स्थानमै छ। कीर्तिपुर ८ खेलबाट १० अंकसहित पाँचौं स्थानमा छ। लिगमा आइतबार एक मात्र खेलमा गोल्डेनगेट र सामाखुसी युथ क्लबबीच प्रतिस्पर्धा हुनेछ।