काठमाडौं। बंगलादेशले २०२५–२६ सिजनमा दक्षिण एशियाली (सार्क) मुलुकका खेलाडीलाई स्थानीय खेलाडीको रूपमा गन्ने निर्णय गरेको छ।
बंगलादेश फुटबल महासंघ (बिएफएफ) हिजो बसेको कार्यसमिति बैठकले प्रोफेसनल लिग म्यानेजमेन्ट कमिटी (पिएलएमसी)को निर्णयलाई अनुमोदन गरेको हो। बैठकपछि पिएलएमसीका अध्यक्ष तथा बिएफएफका वरिष्ठ उपाध्यक्ष इमरुल हसनले पत्रकारहरूसँग भने, ‘यदि कुनै क्लबले सार्क मुलुकका खेलाडीलाई मैदानमा उतार्न चाहन्छ भने उनीहरूलाई स्थानीय खेलाडीका रूपमा गनिनेछ। क्लबहरूसँग छलफल गरेर हामी कोटाको विषयमा निर्णय लिनेछौं।’
त्यस्तै, पिएलएमसीले बिएफएफ कार्यसमिति, स्थायी तथा अस्थायी समितिका सदस्यहरूलाई क्लबको डगआउटमा बस्न नपाउने निर्णय पनि गरेको छ। नयाँ सिजनका लागि खेलाडी दर्ता खुल्ने मिति जुन १ देखि अगस्ट १४ सम्म कायम गरिएको छ। सिजनको सुरुआत सेप्टेम्बर १२ मा हुने एकदिने च्यालेन्ज कप खेलमार्फत हुनेछ।
यस सिजनमा च्यालेन्ज कप, फेडेरेसन कप, फ्रिडम कप, सुपर कप र बंगलादेश प्रिमियर लिग गरी पाँच प्रतियोगिता हुनेछ। गत सिजनमा क्लबहरूले ६ जना विदेशी खेलाडी दर्ता गर्न पाउने र तीमध्ये ४ जना खेलाउन पाउने व्यवस्था थियो। यसपटक भने क्लबहरूले ५ जना विदेशी खेलाडी अनुबन्ध गर्न पाउनेछन्। तर. एउटै खेलमा अधिकतम ३ जना मात्र खेल्न पाउनेछन्। खेलको क्रममा विदेशी खेलाडीहरूबीच प्रतिस्थापन गर्न भने छुट दिइनेछ।
हसनका अनुसार भारतसहित दक्षिण एसियाका अन्य देशहरूले पनि सार्क फुटबल महासंघको सिफारिसमा यो नीति लागू गर्ने तयारी गरिरहेका छन्। बंगलादेशी खेलाडीहरूको अवसर घट्ने चिन्ताबारे प्रश्न गर्दा हसनले भने,‘हामी यसलाई सकारात्मक रूपमा हेर्न चाहन्छौं। यसले बंगलादेशी खेलाडीहरूलाई पनि विदेशी लिगहरूमा खेल्ने अवसर दिलाउनेछ।’
