काठमाडौं। इन्टर मियामीले अमेरिकन सकर लिग (एमएलएस) मोन्ट्रियललाई ४–२ ले पराजित गर्दै पछिल्ला खेलको खराब प्रदर्शनमा सुधार गर्ने संकेत दिएको छ।
यो जितमा लिओनल मेसी र लुइस सुआरेजले समान दुई गोल गरे। सुआरेजले एक गोलमा असिस्ट पनि गरे। यस जितसँगै मेसीको टोली मियामीले पछिल्ला आठमध्ये दोस्रो खेलमा जित हात पारेको हो।
मियामीले अघिल्लो जित मे ३ मा निकालेको थियो। त्यसयता क्लबले दुई हार र दुई बराबरी खेलेको थियो र इस्टर्न कन्फरेन्समा छैटौं स्थानमा झरेको थियो।
यो खराब लय आश्चर्यजनक थियो। मियामीले २०२४ को नियमित सिजनमा २२–४–८ को कीर्तिमानी प्रदर्शन गर्दै ७४ अंक जोडेको थियो। यो एमएलएस इतिहासकै सबैभन्दा उच्च हो। क्लबले सपोर्टर्स शिल्ड पनि जितेको थियो।
मियामीले अघिल्लो खेलमा फिलाडेल्फियाविरुद्ध दुई गोलले पछि परेको अवस्थाबाट पुनरागमन गरेको थियो। त्यसैको सकारात्मक प्रभाव यो खेलमा पनि देखियो। मियामीलेपूर्वी कन्फरेन्सको पुछारमा रहेको मोन्ट्रियललाई सजिलै हरायो।
मेसीको पहिलो गोल सर्जियो बुस्केट्सको पास निस्किएको थियो। यो उनको सिजनको सातौं गोल हो। त्यसपछि मेसीले ६८औं मिनेटमा सुआरेजको गोलका लागि ड्रिबल गरेर असिस्ट गरे।
सुआरेजले अर्को गोल ७१औं मिनेटमा थपे।८७औं मिनेटमा सुआरेजकै पासमा अर्को गोल थप्दै खेलमा जित सुनिश्चित गरे। सुआरेजका लागि यो खेल विशेष रह्यो। गत सिजन उनले २० गोल गर्दै एमएलएसमा दोस्रो शीर्ष स्कोरर बनेका थिए।
तर, यो सिजन बुधबारको खेलअघि उनको नाममा जम्मा दुई गोल मात्रै थियो। यस खेलमा दुई गोलसहित उनले आफ्नो आत्मविश्वास फर्काएको देखियो।
मोन्ट्रियलका डान्टे सीली र भिक्टर लोटुरीले गोल गरे। तर, यो गोल खेलमा फर्किन अपर्याप्त रह्यो। मोन्ट्रियलको यो सिजन निकै निराशाजनक रहँदै आएको छ। टोलीले हालसम्म जम्मा एक जित मात्रै निकालेको छ।
यो जित मियामीका लागि उपयुक्त समयमै आएको हो। अब क्लबले शनिबार घरेलु मैदानमा कोलम्बस क्रुविरुद्ध खेल्नेछन्। त्यसपछि जुन १४ मा क्लब विश्वकपको पहिलो खेलमा इजिप्टको अल आहलीसँग भिड्नेछन्।
