पथरी। साबिक विजेता सिरिजंघा एफसी दोस्रो पथरीशनिश्चरे नगर खेलकुद महोत्सवअन्तर्गत बुधबार सम्पन्न फुटबल खेलमा टाइब्रेकरमा पराजित हुँदै प्रतियोगिताबाट बाहिरिएको छ।
क्वार्टरफाइनल खेलमा प्रभात सामुदायिक क्लबसँग सिरिजंघा ३–२ ले पराजित भएको हो। निर्धारित ७० मिनेटको खेल १–१ गोलको बराबरीमा सकिएको थियो। त्यसपछि विजेता छिनोफानो टाइब्रेकरमार्फत गरिएको हो।
टाइब्रेकरमा सिरिजंघाका जुनियर साँवा र विशाल चौधरीले गोल गरे। नारायण श्रेष्ठ, सोच्छहाङ लिम्बू र निमन लिम्बू गोल गर्न असफल भए। प्रभातका युकेश तामाङ, धिरेन विष्ट र सौर्य राउतले गोल गर्दै टिमलाई जित दिलाए। दिपेश मगरको प्रहार भने बाहिरिएको थियो।
१६औं मिनेटमा आर्सित कार्कीले प्रभातका लागि सुरुआती गोल गर्दै अग्रता दिलाएका थिए। पहिलो हाफको अतिरिक्त समयमा सिरिजंघाले पेनाल्टीमार्फत बराबरी गोल फर्कायो। जुनियर साँवाले पेनाल्टीमा गोल गरेका हुन्।
खेलको ‘म्यान अफ द म्याच’ पराजित टिमका सिरिजंघाका विशाल चौधरी घोषित भए।
-1739018575.jpg)
