काठमाडौं। बंगलादेश राष्ट्रिय महिला फुटबल टोलीका मुख्य प्रशिक्षक पीटर बटलरविरुद्ध विद्रोह गरेका सबै १८ खेलाडीले केन्द्रीय सम्झौता गरेका छन्।
बंगलादेश फुटबल महासंघ (बिएफएफ) ले ती खेलाडीलाई सम्झौतामा ल्याएको हो। सिनियर खेलाडी सबिना खातुन, सन्जिदा अख्तर र मारिया मन्डालगायतका विद्रोही खेलाडीले बिएफएफसँग ६ महिनाको सम्झौता गरेका हुन्।
बिएफएफ महिला विभागकी अध्यक्ष तथा कार्यकारिणी सदस्य महफुजा अख्तर किरोनका अनुसार योसँगै सम्झौतामा रहने खेलाडीको संख्या ५४ पुगेको छ। बिएफएफले यसअघि ३६ नयाँ खेलाडीसँग सम्झौता गरेको थियो।
‘बाँकी सबै १८ खेलाडीहरूले ६ महिनाको लागि सम्झौता गरेका छन्। जुन उनीहरूले हस्ताक्षर गरेको मितिदेखि लागु हुन्छ,‘ उनले भनिन्। यी १८ मध्ये आठ खेलाडी अहिले बटलरको बन्द प्रशिक्षमा सहभागी छन्।
सबिना, मारिया, मोनिका चक्मा, माशुरा परविन, कृष्णा रानी सरकार, रितु पर्ना चक्मालगायतका १० खेलाडी भुटानमा चलिरहेको महिला राष्ट्रिय लिग खेलिरहेका छन्। ‘हामीले भुटानमा रहेका १० खेलाडीहरूलाई अनलाइनमार्फत सम्झौताका कागजात पठायौं र उनीहरूले हस्ताक्षर गरेर फिर्ता पठाए,’ किरोनले भनिन्।
बिएफएफ स्रोतअनुसार १८ खेलाडीहरूलाई चार श्रेणीमा विभाजन गरिएको छ। ‘ए’ श्रेणीमा १२ खेलाडीले मासिक ५५ हजार टका (नेपाली ६१ हजार रुपैयाँ) पाउनेछन्। ‘बी’ श्रेणीमा एकले ४० हजार, ‘सी’ श्रेणीमा एकले ३० हजार र ‘डी’ श्रेणीका चार खेलाडीले २५ हजार टका मासिक तलब पाउनेछन्।
गत जनवरीमा सिनियर खेलाडीहरू र इङ्लिस प्रशिक्षक बटलरबीच तनाव झनै चर्किएको थियो। त्यही बेला बिएफएफले मार्चमा हुने फिफा मैत्रीपूर्ण खेलका लागि बन्द प्रशिक्षणमा रहेका सबै ५५ खेलाडीलाई नयाँ सम्झौता गर्न प्रस्ताव गरेको थियो। तर, ती १८ खेलाडीले प्रशिक्षक बटलरको राजीनामा माग गर्दै सम्झौतामा हस्ताक्षर गर्न अस्वीकार गरेका थिए।
तर, यो विवाद मार्चको अन्त्यतिर समाप्त भएको हो। विवाद अन्त्य भएसँगै विद्रोही खेलाडीहरू ईद ब्रेकपछि बटलरको प्रशिक्षणमा फर्कन तयार भएका थिए। अधिकांश खेलाडी अप्रिल ६ मा प्रशिक्षणमा फर्किएका हुन्। तर, सबिना, मोनिका, रितु पर्ना र सुमैया भुटान महिला लिग खेल्न गएका थिए। केही दिनपछि थप ६ खेलाडी भुटान पुगे।
बंगलादेश महिला टोलीले मे ३१ र जुन ३ मा जोर्डन र इन्डोनेसियाविरुद्ध दुई फिफा मैत्रीपूर्ण खेल खेल्ने तालिका छ।
भुटानमा रहेका खेलाडीको छनोट कसरी हुने भन्ने प्रश्नमा किरोनले भनिन्,‘यो निर्णय मुख्य प्रशिक्षककै जिम्मेवारी हो। उहाँले खेलाडीहरूको फिटनेस र प्रदर्शनको मूल्यांकन गरेर टोली छनोट गर्नुहुनेछ।’
