यु–२३ एसियन कप छनोटका खेलहरू ११ राष्ट्रले आयोजना गर्ने

काठमाडौं। एएफसी यु–२३ एसियन कप २०२६ छनोट चरणका खेलहरू ११ राष्ट्रले आयोजना गर्ने भएका छन्।

एसियन फुटबल महासंघ (एएफसी)ले सोमबार उक्त जानकारी दिएको हो। एएफसीका अनुसार कम्बोडिया, चीन, इन्डोनेसिया, जोर्डन, कीर्गिस्तान, म्यानमार, कतार, ताजकिस्तान, थाइल्यान्ड, युएई र भियतनामले छनोट चरणका खेल खेल्न लागेका हुन्।

एएफसीले सोमबार नै ‘ड्र’ का लागि ‘पट’मा छुट्टाइसकेको छ। सिडिङ ‘पट’ पछिल्ला तीन यु–२३ एसियन कप (२०२०, २०२२, २०२४) का समग्र प्रदर्शनको आधारमा निर्धारण गरिएको हो।

नेपाल ‘पट’मा ४ मा छ। यो ‘पट’मा नेपालसहित अफगानिस्तान, बंगलादेश, मंगोलिया, गुआम, पाकिस्तान, मकाउ, ब्रुनाइ, भुटान र नर्थ मारिना आयरल्यान्ड छन्।

भारत भने ‘पट’ ३ मा परेको छ। एएफसीका अनुसार ‘ड्र’ मे २९ मा मलेसियाको क्वालालम्पुरस्थित एएफसी मुख्यालयमा स्थानीय समय अनुसार दिउँसो २ बजे हुने तय छ। 

यस छनोट प्रतियोगितामा ४४ वटा यु–२३ राष्ट्रिय टोली सहभागी हुनेछन्। ती टोलीलाई ११ समूहमा विभाजन गरिनेछ। छनोट खेलहरू सेप्टेम्बर १ देखि ९ सम्म सञ्चालन हुनेछन्।

प्रत्येक समूहको शीर्ष टोली र चार उत्कृष्ट उपविजेता टोलीले २०२६ मा साउदी अरबमा आयोजना हुने प्रतियोगितामा स्थान बनाउनेछन्। आयोजक राष्ट्र साउदी भने सिधै छनोट भइसकेको छ।