फर्नान्डेसलाई ठूलो रकममा अनुबन्ध गर्ने अल–हिलालको योजना

काठमाडौं। ब्रुनो फर्नान्डेसलाई यस समरमा साउदी प्रो–लिग क्लब अल–हिलालले ठूलो रकममा अनुबन्ध गर्ने योजना बनाएको छ। तर, म्यानचेस्टर युनाइटेडले आफ्नो कप्तानलाई बेच्ने कुनै योजना नरहेको स्पष्ट पारेको छ।

लिभरपुलका मोहम्मद सालाहले क्लबमै बस्ने निर्णय गरेपछि अल–हिलालसँग अब अर्को ठूलो नाम भित्र्याउने बजेट उपलब्ध छ। मध्यपूर्वका रिपोर्टअनुसार ब्रुनोका प्रतिनिधिहरूले सोमबार अल–हिलालसँग छलफल गरेका थिए।

ब्रुनोले युनाइटेडसँग सन् २०२७ सम्मको नयाँ अनुबन्धमा हस्ताक्षर गर्नु अघि नै गत वर्ष यी दुई पक्षबीच प्रारम्भिक सम्पर्क भएको बुझिएको छ। अनुबन्धमा १२ महिनाको सम्झौता थप बढाउन सक्ने विकल्प पनि छ।

३० वर्षीय प्लेमेकर फर्नान्डेस यो सिजन पनि युनाइटेडका सबैभन्दा उत्कृष्ट खेलाडीमध्ये हुन्। उनले हालसम्म १९ गोल र १८ असिस्ट गरेका छन्। युनाइटेडले नयाँ प्रशिक्षक रुबेन अमोरिम नेतृत्वमा टिम पुनर्निर्माण गर्ने क्रममा ब्रुनोलाई राख्न चाहन्छ।

सोमबार राति युनाइटेडले अल–हिलालबाट अहिलेसम्म कुनै औपचारिक प्रस्ताव नआएको जनाएको छ। प्रस्ताव आए पनि क्लबले फर्नान्डेसलाई बेच्ने विचार नगरेको जानकारी खिएको छ।

मार्चमा प्रशिक्षक अमोरिमले रियल मड्रिडमा ब्रुनोको सम्भावित अनुबन्धको अड्कललाई नकार्दै भनेका थिए,‘होइन, त्यो हुनेवाला छैन। मैले उसलाई पहिल्यै भनिसकेको छु उनी कतै जाँदैनन्।’

साउदी प्रो–लिगका ठूला चार क्लबमध्ये एक अल–हिलालले क्लब विश्वकप सुरु हुनु अघि ठूलो नाम भित्र्याउने लक्ष्य लिएको छ। तर, हाल अल–हिलाल क्लब छाडेका प्रशिक्षक जोर्ज जिससको स्थानमा नयाँ प्रशिक्षक नियुक्त गर्न केन्द्रित छ।