काठमाडौं। पेरिस सेन्ट–जर्मेन (पिएसजी) फेरि एकपटक इङ्ल्यान्डबाट उच्च मनोबलसहित फर्किंदैछ। यो टोली च्याम्पियन्स लिगको दोस्रो फाइनल यात्रा अब केही हातको दुरीमा छ।
मंगलबार राति भएको सेमिफाइनलको पहिलो लेगमा ओस्मान डेम्बेलेले खेलको चौथो मिनेटमै गरेको गोलले पिएसजीलाई आर्सनलविरुद्ध १–० को जित दिलायो। खेलको अन्त्यतिर केही अवसरहरू नचुकाएको भए अग्रता अझ फराकिलो हुन सक्थ्यो।
यो एक सानदार रात थियो। हामीले अझ गोल गर्न सक्थ्यौं। तर, १–० को नतिजामा सन्तुष्ट छौं। अब हामी फाइनल पुग्न सबैथोक गर्नेछौं, पिएसजीका मिडफिल्डर भिटिन्हाले भने।
पहिले नै प्रिमियर लिग च्याम्पियन लिभरपुल र एस्टन भिल्लालाई नकआउट चरणमा हराइसकेको पिएसजीले आर्सनललाई पनि विपक्षीको घरेलु मैदानमा नै पराजित गर्यो। गत अक्टोबरमा यही स्टेडियममा आर्सनलसँग पिएसजी २–० ले पराजित भएको थियो। तर, यसपटक टोलीले परिपक्वता देखायो।
हरेक खेलमा चम्किने खेलाडी किलियन एमबाप्पेबिना नै यो युवा टोली अझ सशक्त देखिएको छ। उल्लेखनीय कुरा के हो भने एमबाप्पेको रियल मड्रिडले यही मैदानमा क्वार्टरफाइनलमा ३–० को हार बेहोरेको थियो।
खेलको सुरुमा नै पिएसजीले आर्सनललाई दबाबमा राख्दै आक्रमण थालेको थियो। चौथो मिनेटमा ख्विचा ख्वारात्स्खेलियाको पासमा डेम्बेलेले पहिलो टचमै गोल गर्दै टिमलाई अग्रता दिलाए। त्यो गोल बनाउन पिएसजीले लगातार २६ पास खेलेको थियो, जुन सन् २००३–०४ यता च्याम्पियन्स लिगमा टोलीको सर्वाधिक हो।
हामीले हाम्रो शैली देखायौं। हामीले जसरी खेल्ने गर्छौं, त्यसरी नै खेल्दै सुरुमै गोल गर्यौं, पिएसजीका प्रशिक्षक लुइस एनरिकेले भने। आर्सनल भने पहिलो सेमिफाइनलमा सन् २००९ यता पुगेको थियो। तर, मध्यपंक्तिका खेलाडी थोमस पार्टे प्रतिबन्धित भएपछि टोली थप दबाबमा देखियो।
पिएसजीको तीव्र खेल शैलीलाई आर्सनलले रोक्न सकेन। पहिलो हाफमा फ्रेन्च टोलीले पूर्ण दबाब राख्यो। उनीहरूले खेलको सुरुमै गोल गरे र पहिलो १५–२० मिनेटसम्म पूर्ण नियन्त्रणमा राखेका थिए थिए। तर, यो त केवल पहिलो हाफ हो, सकारात्मक पक्षमा लिन्छौं, आर्सनलका गोलकिपर डेविड राया भन्छन्।
ख्वारात्स्खेलियाले लगातार आर्सनललाई अप्ठ्यारोमा पारिरहे। उनले १७ औं मिनेटमा पेनाल्टीको माग गरे र २६ औं मिनेटमा रायाले सट बचाए। ३१औं मिनेटमा डेसाइर डोउएको प्रयास पनि उनले जोगाए।
पहिलो हाफको केहीअघि ग्याब्रियल मार्टिनेलीको सटलाई जियानलुइजी डोनारुम्माले एक हातले अद्भुत बचाउ गर्दै आर्सनललाई बराबरी गर्न दिएनन्। दोस्रो हाफमा आर्सनलले सुधारिएको प्रदर्शन गर्यो। डेक्लान राइसको फ्रिकिकमा मिकेल मेरिनोले हेडरमार्फत गोल गरेका थिए। तर, लामो भिएआर जाँचपछि अफसाइड ठहरियो।
पछि लिआन्ड्रो ट्रोसार्डको सटलाई पनि डोनारुम्माले कुशलतापूर्वक बचाए। यही त हो गोलकिपरको काम हो। होइन र? उनीहरू त्यसैका लागि दिनरात अभ्यास गर्छन्, प्रशिक्षक एनरिकेले भने।
पिएसजीका वैकल्पिक खेलाडी ब्राडली बारकोला र गोन्कालो रामोसले खेलको अन्त्यतिर स्पष्ट मौका पाएका थिए। तर, गोल गर्न सकेनन्। बारकोलाको प्रहार थोरै फराकिलो भयो भने रामोसको प्रहार बारमा ठोकियो।
अब हामी पेरिसमा गएर जित्नैपर्छ। च्याम्पियन्स लिग फाइनल पुग्न विशेष केही गर्नैपर्छ र हामी त्यो गर्न तयार छौं, आर्सनल प्रशिक्षक मिकेल आर्टेटाले भने।
दुवै टोली आफ्नो पहिलो च्याम्पियन्स लिग उपाधि जित्ने लक्ष्यमा छन्। पिएसजीले सन् २०२० मा बायर्न म्युनिखसँग फाइनल हार बेहोरेको थियो। आर्सनल भने २००६ मा बार्सिलोनासँग पराजित हुँदा उपविजेता भयो। अब अर्को सेमिफाइनलमा बुधबार बार्सिलोना र इन्टर मिलान आमनेसामने हुँदैछन्।
