काठमाडौं। ललितपुर सिटी एफसीका मणिकुमार लामा नेपाल सुपर लिग (एनएसएल) को तेस्रो संस्करणका ‘इनर्जेटिक प्लेयर’ घोषित भएका छन्।
डिफेन्सिभ मिडफिल्ड मणिले एक गोल र दुई असिस्ट गरेका थिए। उनले एक लाख रुपैयाँ हात पारे। उनी रेफ्रीको खराब निर्णयका कारण फाइनल गुमाउने संघारमा थिए। तर, ललितपुरको अडानका कारण उनी फाइनल खेल्न योग्य भए।
त्रिपुरेश्वरस्थित दशरथ रंगशालामा अघिल्लो शनिबार धनगढीविरुद्ध पहिलो क्वालिफायरमा मिडफिल्डर मणिले १६औं मिनेटमा रातो कार्ड पाएका थिए। मणिको खुट्टामा रहेको ‘एअर बल’लाई क्लियर गर्न धनगढीका डिफेन्सिभ मिडफिल्डर मोहमम्द अल जाउलीनी पुगेका थिए।
उनले मणिबाट कुनै खतरा नरहेको अवस्थामा सिधै खुट्टाले छात्तीमा प्रहार गरेका थिए। तर, मुख्य रेफ्री उमेश बिडारीले फोर्थ अफिसियल श्याम दनुवारसँग सल्लाह गरेपछि उल्टै मणिलाई सिधै रातो कार्ड दिएका थिए। लगत्तै ललितपुरले उक्त निर्णयविरुद्ध अपील गरेको थियो। उक्त अपीलमा मणिको कार्ड फिर्ता नभए ललितपुरले फाइनल नखेल्नेसम्मको निर्णय गरेको थियो।
उक्त अपीलमाथि सुनुवाई गर्दै एनएसएल आयोजक नेपाल स्पोर्ट्स एन्ड इभेन्ट म्यानेजमेन्ट (एनएसइएम) र अपिल समितिले गत मंगलबार रेफ्रीले गल्ती गरेको स्वीकार्दै मणिले पाएको रातो कार्ड फिर्ता लिएको थियो।
‘उक्त घटनाको विभिन्न क्यामेरा कोण र प्रोडक्सन टोलीबाट प्राप्त गरिएको फुटेजको आधारमा समीक्षा गर्दा मणिले कुनै स्पष्ट प्रतिशोधको कार्य गरेको प्रमाण भेटिएन,’ एनएसइएमले ललितपुरलाई पठाएको पत्रमा भनिएको थियो।
मोहम्मद सामुन्ने लड्दा मणिको खुट्टाले कतै लागेको देखिएको थिए। तर, मोहम्मद मैदानमा लडेर ठूलो नाटक मञ्चन गरेपछि ललितपुरका कप्तान अनन्त तामाङसहित खेलाडीले गरेको अपीलमा पनि बिडारीले कुनै चासो देखाएका थिएनन्। सहायक रेफ्री किसन कन्हैयाले पनि प्रतिवाद गरेनन्।
बरु मणिलाई नै मैदान बाहिर पठाइएको थियो। मणिलाई सिधै छात्तीमा प्रहार गर्ने मोहम्मदले भने पहेँलो कार्ड मात्रै पाए। मुख्य रेफ्री बिडारी र फोर्थ अफिसियल दनुवार फिफा ब्याच प्राप्त रेफ्री हुन्।
बिडारीले यही वर्ष फिफा रेफ्रीको ब्याच पाएका हुन्। यसका बाबजुद पनि ललितपुरले २–१ को जित निकाल्दै फाइनलको यात्रा तय गरेको थियो। यस आधारमा मणिलाई दिइएको रातो कार्ड फिर्ता लिने निर्णय गरेको बताइएको छ। त्यसैले उनी फाइनल खेल्न योग्य भएका थिए।
