काठमाडौं। ललितपुर सिटी एफसी नेपाल सुपर लिग (एनएसएल) को उपाधि हकदार थियो, उत्तिनै पोखरा थन्डर्स पनि थियो।
सुरुआती दुई खेलमा पराजय बेहोर्दै तेस्रो संस्करणको थालनी गरेको पोखराले त्यसपछिका पाँच खेलमा अपराजित रहँदै फाइनलसम्मको यात्रा तय गर्यो। तर, पहिलोपल्ट फाइनल पुगेर एक गोल खाइसकेको अवस्थामा पुनरागमन गरिसकेको पोखरा अन्तत: खेलको अन्तिम १६ मिनेट सम्हालिन सकेन र उपाधि गुमाउन पुग्यो।
त्रिपुरेश्वरस्थित दशरथ रंगशालामा शनिबार सम्पन्न खेलमा ललितपुरले दुई विदेशी खेलाडीको गोलमा २–१ को जित हात पारेको हो। ललितपुरको यो दोस्रो उपाधि हो।
पोखराका मार्की प्लेयर आयुष घलानले जस्तो सुरुआत भए पनि अन्तिमसम्म राम्रो नै भएको बताए। त्यसैले अर्को संस्करणमा उपाधि जित्न २०० प्रतिशत दिने उनले बताए।
‘अर्को संस्करणमा उपाधि जित्न १०० होइन २०० प्रतिशत दिन्छौं,’ खेलपछि आयुषले भने। आयुष पहिलो संस्करणमा ट्यालेन्ट हन्टमार्फत पोखरामा अनुबन्ध भएका थिए। उक्त संस्करणमा प्रभावशाली प्रदर्शन गरेसँगै उनले आफ्नो करियरमा पछाडि फर्किएर हेर्न परेको छैन।
सोही संस्करणबाट नेपाली राष्ट्रिय फुटबल टोलीमा पुगेका उनले त्यसयताका दुई संस्करण पोखरामा नै बिताएका छन्। दोस्रो संस्करणमा पोखरालाई प्लेअफसम्म पुर्याउँदा उनी मार्की प्लेयर थिए।
यसपल्ट भने उनले आफ्नो कप्तानीमा पोखरालाई उपाधिसम्म पुर्याएका हुन्। तर, ललितपुरका दुई विदेशी इमो इजिकेल र पापा इबु केबको प्रभाशाली प्रदर्शनसामु उपाधि भने दिलाउन सकेन।
ललितपुरलाई जित दिलाउन इजिकेलले यसपल्ट पनि उत्कृष्ट प्रदर्शन गरे। उनले एक गोल र एक असिस्ट गरे। ललितपुरलाई गत संस्करणको उपाधि दिलाउँदा पनि उनले धनगढी एफसीविरुद्धको फाइनलमा दुई गोल गरेका थिए।
ललितपुर र पोखरा दुवैले धनगढीको चुनौती पार गर्दै यस संस्करणको फाइनलमा भेट पक्का गरेका हुन्। तर, बाजी भने अपराजित रहँदै ललितपुरले मार्यो।
अर्कोतर्फ गैरआवासीय नेपाली संघ (एनआरएनए) कोटामा टोलीमा भित्रिएका सुदील राईले गरेको गोल पनि पोखरालाई पर्याप्त हुन सकेन। ‘सबै हामीले दिएका थियौं। तर, नतिजा ल्याउन सकेनौं। त्यसका लागि सबैसँग माफी माग्न चाहन्छु,’ आयुषले टुंगाए।
