क्रिकेट एक्सिलेन्स सेन्टर र न्यु भिजन सेमिफाइनलमा

काठमाडौं। क्रिकेट एक्सिलेन्स सेन्टर र न्यु भिजन क्लब प्रधानमन्त्री कप पुरुष क्रिकेट काठमाडौं जिल्ला छनोट सेमिफाइनलमा प्रवेश गरेका छन्।

बिहीबार सम्पन्न खेलमा वान डे क्रिकेट एकेडेमीलाई नौ विकेटले पराजित गरेको हो। अर्को खेलमा न्यु भिजनले फरेभर क्रिकेट ब्वाइज क्लबलाई ५४ रनले पराजित गर्‍यो।

वान डेले प्रस्तुत गरेको ९६ रनको लक्ष्य पछ्याएको क्रिकेट एक्सिलेन्सले ८.४ ओभरमा एक विकेट गुमाउँदै ९८ बनायो। योसँगै समूह ‘सी’मा क्रिकेट एक्सिलेन्सले दुई खेलमा चार अंक जोड्यो। 

वान डेको भने समान खेलबाट दुई अंक छ। क्रिकेट एक्सिलेन्सका रन्वीर यादवले अविजित रहँदै सर्वाधिक ३८ रन बनाइन्। ऋत गौतमले ३२ रन बनाउँदा पृथु बास्कोटाले अविजित २१ रन बनाए।

वान डेका अभिजित सिंहले एक विकेट लिए। त्यसअघि पहिला ब्याटिङ थालेको वान डेले १९.५ ओभरमा सबै विकेट गुमाउँदै ९५ रन बनाएको थियो। वान डेका तरुण रेग्मीले सर्वाधिक २६ रन बनाए। विकल थापा २० र भुपेश्वर महतो १२ रनमा पभिलियन फर्किए।

क्रिकेट एक्सिलेन्सका विवेकान्द सहानी, राम इकवाल यादव र युगन्त कार्कीले समान दुई विकेट लिए।

अर्को खेलमा न्यु भिजन क्लबले प्रस्तुत गरेको ११६ रनको लक्ष्य पछ्याएको फरेभर १४.२ ओभरमा ६१ रनमै समेटियो। फरेवरका जतिन थापाले १४, सचिन यादवले १२ र लक्ष्मण कार्कीले ११ रन बनाए।

न्यु भिजनका न्सन सिंहले पाँच तथा दिपेश शाह र शार्दुलसम भट्टले समान दुई विकेट लिए। त्यसअघि टस जितेर ब्याटिङ रोजेको न्यु भिजनले निर्धारित २० ओभरमा सबै विकेट गुमाउँदै ११५ रन बनाएको थियो। न्यु भिजनका सार्थक धितालले ४३ र सुमीतध्वाज चन्दले २१ रन बनाए।

फरेभरका मुकेश चन्दले ६ तथा लक्ष्मण कार्की र पंकज पन्तले समान एक विकेट लिए। जितसँगै समूह ‘डी’ को न्यु भिजनले दुई खेलबाट चार अंक जोड्यो फरेभरले भने समान खेलबाट दुई अंक जोडेको छ।