काठमाडौं। चर्चित स्ट्राइकर विमल घर्तीमगरले फुटबल राम्रो भएको खण्डमा राष्ट्रिय फुटबल टोलीमा फर्किने बताएका छन्।
पछिल्लो दुई वर्षदेखि उनी राष्ट्रिय टोलीमा देखिएका छैनन्।नेपालमा फुटबल खेल्ने वातावरण भएको अवस्थामा आफू राष्ट्रिय टोलीमा फर्किने उनले बताएका हुन्। ‘राष्ट्रिय टोलीबाट खेल्न मन छ। देशका लागि खेल्दा गर्व महसुस हुन्छ,’ विमलले खेलपाटीसँग भने, ‘फुटबल राम्रो भए राष्ट्रिय टोलीमा फर्किन्छु।’
अस्ट्रेलियामा रहेका विमल मोफसलको फुटबल खेल्न नेपाल फर्किएका छन्। विमलले मच्छिन्द्र क्लबबाट सभापति कप फुटबल प्रतियोगिताअन्तर्गत विभागीय टोली एपिएफविरुद्ध खेल्दै करिब एक वर्षपछि त्रिपुरेश्वरस्थित दशरथ रंगशालामा पुनरागमन गरेका थिए।
उनले अन्तिपल्ट यो रंगशालामा चितवन एफसीबाट दोस्रो संस्करणको नेपाल सुपर लिग (एनएसएल) खेलेका थिए। अस्ट्रेलियाबाट फर्किएका उनलाई चितवनले ‘आकोनिक प्लेयर’ बनाएको थियो। तर, चितवन आठ खेलबाट नौ अंक जोड्दै सातौं स्थानमा रहेर प्लेअफ पुग्न चुकेको थियो।
यसपल्ट यही मैदानमा उनी दोस्रो हाफमा छिरे। उक्त खेलमा सनिश श्रेष्ठको निर्णायक गोलमा मच्छिन्द्र १–० ले विजयी भएको थियो। यो प्रतियोगिता सक्किएसँगै मच्छिन्द्र मोफसलका प्रतियोगितामा फर्किने छ। फुटबल खेल्ने वातावरण नभएको भन्दै उनी राष्ट्रिय टोलीमा सहभागी हुन छाडेका थिए। त्यसपछि विमलले अन्य फुटबलर जस्तै अस्ट्रेलियालाई गन्तव्य बनाए। फुटबल राम्रो भए राष्ट्रिय टोलीमा फर्किने बाटो नै यही हुने विमल बताउँछन्।
फुटबल राम्रो भएको खण्डमा अस्ट्रेलियाबाट धेरै खेलाडी नेपाल फर्कनेसमेत उनले बताए। ‘हामीले सानैबाट जानेकै फुटबल खेल्न हो। तर, अस्ट्रेलियामा खेलाडीले काम गर्नुपरेको छ। फुटबल राम्रो भए धेरै खेलाडी नेपाल फर्कन्छन्,’ उनले भने।
हेर्नुहोस् विमलसँगको पूरा अन्तर्वार्ता–
-1750064258.webp)
-1750047432.webp)
