काठमाडौं। भारतमा इन्डियन प्रिमियर लिग क्रिकेटपछिको सर्वाधिक लोकप्रिय प्रतियोगिता हो प्रो कबड्डी लिग। जसको फाइनलमा पटना पाइरेट्सलाई पराजित गर्दै हरियणा स्टिलर्स च्याम्पियन भएको थियो। यही च्याम्पियन टिमका रेइडर्स घनश्याम रोका मगर नेपाल कबड्डी लिग (एनकेएल) काठमाडौं आइपुगेका छन्।
नेपाली राष्ट्रिय पुरुष कबड्डी टिमका कप्तान पनि हुन् घनश्याम। २१ वर्षीय उनकै उत्कृष्ट प्रदर्शनमा नेपाली टिम गत वर्ष बंगलादेशमा भएको चौथो बंगबन्धु कबड्डी कपमा उपविजेता भएको थियो। र, उक्त प्रतियोगितामा घनश्यामले मोस्ट भ्याल्युएबल प्लेयरको अवार्ड नै जितेका थिए। नेपाली कबड्डीका यी सबभन्दा ठूला स्टार एनकेएलमा काठमाडौं माभरिक्सका मार्की खेलाडी हुन्।
फ्रेन्चाइज टिमको अवधारणामा पहिलोपल्ट आयोजना गर्न लागिएको एनकेएल माघ ४ गते सुरु हुँदैछ। एनकेएलप्रति घनश्याम निक्कै उत्साहित छन्। लिबाङ, रोल्पा घर भएका उनले सोमबार आयोजित कार्यक्रममा भने, ‘नेपालमा यस्तो (एनकेएल) प्रतियोगिता पहिला कहिल्यै भएको थिएन। यसपालि खेलाडीले राम्रो पैसा पाउँदैछन्। कर्पोरेट हाउसहरूले टिम खरिद गरेका छन्। खेलाडी, कोच सबैले राम्रो सुविधा पाएका छन्।’
विदेशी खेलाडीको आगमन, स्वदेशको नियमित प्रशिक्षणसँगै एनकेएलले नेपाली खेलाडीको स्तर वृद्धि गर्ने उल्लेख गर्दै उनले भने, ‘एनकेएलले नेपाली कबड्डीलाई व्यावसायिक रुपमै स्थापित गर्ने विश्वास छ। एनकेएल भविष्यमा नेपाली खेलकुदकै ठूलो प्रतियोगिताको रूपमा स्थापित हुने आशा गरेको छु।’
घनश्यामले दुई सिजन प्रो कबड्डी लिग खेलेका छन्। गत सिजन पनि हरियणा स्टिलर्सबाटै खेल्दा उनी प्रो कबड्डी लिगमा उपविजेता बनेका थिए। यसपालि भने च्याम्पियन नै भएका हुन्। पुनेमा जितेको उपाधिको खुसीयाली हरियणामा बनाएर उनी स्वदेश फर्किएका हुन्।
एस्ट्रोनिक्स म्यानेजमेन्टद्वारा आयोजित एनकेएलको माघ ४ गते हुने उद्घाटन खेलमा काठमान्डु माभरिक्स र पोखरा लेकर्स भिड्दैछन्। विराटनगर ब्यान्डिट्सले पहिलो खेलमा धनगढी वाइल्डक्याट्सको सामना गर्नेछ। जनकपुर नाइट्सले बुटवलको हिमालयन रेइडर्सविरुद्ध प्रतिस्पर्धा गर्दै एनकेएलमा डेब्यु गर्नेछ।
६ सहरका ६ टिम सहभागी एनकेएलको राउन्ड रोबिन लिगमा १५ खेल हुनेछ, जसको शीर्ष चार टिम नकआउट चरणमा प्रवेश गर्नेछन्। लिगका शीर्ष दुई टिमले माघ १४ गते क्वालिफाइर १ खेल्नेछ, जसको विजेता सीधै फाइनलमा पुग्नेछ।
लिगमा तेस्रो र चौथो स्थानमा रहेका टिमले माघ १४ गते नै इलिमिनेटरमा खेल्नेछ, जसको विजेता क्वालिफायर २ मा पुग्नेछ। क्वालिफायर १ मा पराजित भएका टिम र इलिमिनेटरका विजेताबिच माघ १६ गते हुने क्वलिफायर २ मा जित हासिल गर्ने टिमले फाइनलमा स्थान पाउनेछ। फाइनल माघ १८ गते हुनेछ। एनकेएल खेल्न थाइल्यान्ड, बंगलादेश र श्रीलंकाबाट १८ खेलाडी पनि काठमाडौं आइसकेका छन्।
हेर्नुस् पूरा भिडियो–
