पहिलो अभ्यास खेलमा नेपाल पराजित
काठमाडौं। नेपाल पहिलो अभ्यास खेलमा पराजित भएको छ। आइसिसी यु–१९ महिला टी–२० विश्वकपको तयारीस्वरुप नेपालले सोमबार वेस्ट इन्डिजको सामना गरेको हो। तर, कुनै पनि ब्याटर जम्न नसक्दा नेपालले ९ रनको पराजय बेहोर्यो।
वेस्ट इन्डिजले दिएको ११० रनको लक्ष्य पछ्याएको नेपालले १९.१ ओभरमा सबै विकेट गुमाउँदै १०० रन मात्रै बनाउन सक्यो। नेपालले अब दोस्रो अभ्यास खेल माघ २ गते अमेरिकासँग खेल्नेछ।
नेपालका लागि सिमना केसीले अलराउन्ड प्रदर्शन गरिन्। बलिङतर्फ एक विकेट लिएका उनले ब्याटिङमा पनि सर्वाधिक २३ रनको योगदान दिएकी थिइन्। तर, १९ बलमा तीन चौका प्रहार गरेकी उनको त्यो इनिङ्स नेपालको जितमा पर्याप्त बनेन। नेपालले पहिलो बलमै ओपनर सना प्रविणलाई शून्य रनमा गुमाएको थियो।
अर्की ओपनर सावित्री धामी पनि पाँच रनमै पेभिलियन फर्किइन्। स्कोर बोर्डमा ६ रन थपिँदा कप्तान पूजा महतो पनि १८ रनमा क्याच आउट हुँदा नेपालको संकट चुलिएको थियो।
उपकप्तान सोनी पाख्रिन र जोत्सनिका मरासिनीले इनिङ्स उकास्ने प्रयास गरेपनि १४ रनभन्दा बढीको साझेदारी गर्न सकेनन्। जोत्सनिका र अनिशाकुमारी यादव समान एक रनमा आलियाह विकेन्सबाट क्याच आउट हुँदा सोनी पनि १५ रनमै बोल्ड हुन पुगिन्।
त्यसपछि किरणकुमारी कुँवर र सिमना केसीले सातौं विकेटका लागि ३० रनको साझेदारी गर्दै जितनजिक पुर्याएका थिए। तर, किरण १८ र सिमना २३ रनमा आउट भएपछि तल्लोक्रममा ब्याटरले फिनिसिङ गर्न सकेनन् र एक रन बनाउँदा दुई विकेट गुमाउन पुगे।
वेस्ट इन्डिजका त्रिशा हरदत, अमिया गिल्बर्ट र अलियाहले समान दुई विकेट लिइन्। एक विकेट केनिका क्यासरको नाममा रह्यो।
