नेपालमा पाँच वर्षपछि अन्तर्राष्ट्रिय ब्याडमिन्टन प्रतियोगिता हुने

काठमाडौं। नेपालमा पाँच वर्षयता पहिलो ब्याडमिन्टन प्रतियोगिताको रुपमा नेपाल इन्टरनेसनल च्यालेन्ज २०२४ त्रिपुरेश्वरस्थित कभर्ड हलमा अर्को साता हुने भएको छ। त्यसलगत्तै नेपाल जुनियर इन्टरनेसनल सिरिज २०२४ पनि आयोजना हुँदैछ।

नेपाल इन्टरनेसनल च्यालेन्ज पुस ८ देखि ११ गतेसम्म सञ्चालन हुने हुनेछ, जसमा २२ देशका १ सय ७६ जना खेलाडीले प्रतिस्पर्धा गर्ने आयोजक नेपाल ब्याडमिन्टन संघले पत्रकार सम्मेलन गर्दै विहीबार जनाएको छ। नेपाल जुनियर इन्टरनेसनल सिरिज २०२४ पुस १२ देखि १४ गतेसम्म सञ्चालन हुनेछ, जसमा ११ देशका १ सय ४४ खेलाडी सहभागि हुनेछन्। दुवै प्रतियोगितामा घरेलु खेलाडीको संख्या १६–१६ हुनेछन्।

संघले सन् २०१९ मा पनि नेपाल इन्टरनेसनल च्यालेन्ज आयोजना गरेको थियो, जसमा १७ देशका ब्याडमिन्टन खेलाडीले प्रतिस्पर्धा गरेका थिए। त्यसयता नेपालमा ब्याडमिन्टनको अन्तर्राष्ट्रिय प्रतियोगिता पहिलोपल्ट आयोजना गर्न लागिएको संघका सचिव दीपक थापाले बताए। दुई प्रतियोगिताको लागि करिब १ करोड १६ लाख रुपिया खर्च हुने बताइएको छ।

इन्टरनेसनल च्यालेन्जमा खुला रुपमा जुनसुकै उमेरका खेलाडी सहभािग हुन पाउनेछन् र यसमा गर्ने प्रदर्शनको आधारमा खेलाडीको विश्व ब्याडमिन्टन महासंघ ९बीडब्लुएफ० को वरीयतामा पनि प्रभाव पार्नेछ। जुनियर इन्टरनेसनल सिरिजमा १९ वर्षमुनिका खेलाडी सहभागि हुनेछन्। दुवै प्रतियोगितामा समान ५ स्पर्धासमावेश गरिएको छ, जसमा मेन्स सिंगल, वुमेन्स सिंगल, मेन्स डबल्स, वुमेन्स डबल्स र मिक्स डबल्स छन्।

इन्टरनेसनल च्यालेन्जको १५ हजार अमेरिकी डलर ९करिब २० लाख ६२ हजार रुपिया० पुरस्कार प्रायोजक योनेक्स सनराइजले उपलब्ध गराउनेछ। प्रत्येक स्पर्धाका विजेताले १ हजार २ सय र उपविजेताले ७ सय २० डलर पाउनेछन्। सेमिफाइनल पुग्नेले ३ सय र अन्तिम आठसम्मको यात्रा गर्नेले १ सय २० डलर हात पार्नेछन्।