काठमाडौं । नेपाल ओलम्पिक कमिटि (एनओसी)को आसन्न निर्वाचनमा खेलकुद संघबाट नयाँ अनुहारको प्रवेश भएको छ । अन्यौलमा रहेको एनओसीको आसन्न निर्वाचनका लागि ओलम्पिकमा आबद्ध खेलकुद संघले नयाँ अनुहारलाई प्रतिनिधिको रुपमा पठाएका छन् ।
निकै चासोका साथ हेरिएको ओलम्पिकको आसन्न निर्वाचनका लागि नेपाल कबड्डी संघबाट महासचिव अरबिन्दकुमार झा, नेपाल हक्की संघबाट अध्यक्ष अनिल शर्मा र नेपाल उसु संघबाट लाक्पा छिरिङ लामा प्रतिनिधि छनोट भएका छन् ।
तीन वटै खेलकुद संघमा नेतृत्व परिवर्तनको प्रभाव ओलम्पिक प्रतिनिधिको रुपमा परेको छ । नेपाल कबड्डी संघमा अरबिन्द कुमार झाको अध्यक्ष बाहेक पुरै प्यानलले जित हासिल गरेको थियो । अध्यक्षमा तुलसा थापालाई राखेर अबिन्दले कबड्डीको पुरै कार्यसमितिमा आफ्नो प्यानल जिताएका थिए । नेपाल कबड्डी संघको सचिवालय बैठकले आसन्न ओलम्पिक चुनावमा अरबिन्दलाई संघको प्रतिनिधिको रुपमा पठाउने निर्णय गरेको हो । संघकी अध्यक्ष तुलसा थापाले हस्ताक्षर गरेर महासचिव अरबिन्दलाई ओलम्पिकको आधिकारिक प्रतिनिधिको रुपमा अघि सारेकी छिन् ।
तुलसा ओलम्पिकको वर्तमान कार्यसमितिमा सचिव पदमा छिन् । तर कमजोर स्वास्थ्य अवस्था र वामदेव गौतमको ओरालो राजनीतिक यात्राका लागि उनलाई कसैले मान्ने अवस्था छैन । कबड्डी संघको सिंगो कार्यसमितिमा एक्लो अवस्थामा रहेकी उनी कुनैपनि समय महाअभियोग प्रस्ताव आउने डरमा छिन् ।
नेपाल हक्की संघबाट अनिल शर्मा प्रतिनिधि बनेका छन् । नेपाल ओलम्पिक कमिटिको अघिल्लो चुनावमा नेतृत्वमा टक्कर दिएका उमेशलाल प्रधानको बहिर्गमनसँगै हक्की संघमा शर्मा आएका छन् । नेतृत्व परिवर्तनसँगै हक्की संघले अध्यक्षलाई ओलम्पिक प्रतिनिधिको रुपमा अघि सारेको हो ।
नेपाल उसु संघबाट भने लाक्पा छिरिङ लामा प्रतिनिधि बनेका छन् । राष्ट्रिय खेलकुद परिषद्को निर्वाचन प्रक्रियाबाट आएको जनक बर्तौला नेतृत्वको कार्यसमितिले अन्तराष्ट्रिय मान्यता पाएको छैन । पुरानै कार्यसमितिको नेतृत्व गरिरहेका लाक्पा ओलम्पिक प्रतिनिधिको रुपमा आसन्न चुनावका लागि नेपाल ओलम्पिक कमिटिमा पत्र दर्ता गराएका छन् ।
अघिल्लो ओलम्पिक चुनावमा सदस्य सचिव केशवकुमार विष्ट उसुबाट प्रतिनिधि बनेर गएका थिए । तर ओलम्पिकभित्रको सिन्डिकेटका कारण प्यानल विजयी बन्दा समेत विष्टले पार पाउन सकेनन् । त्यही नियति नेपाल रेस्लिङ संघका तत्कालिन अध्यक्ष समिन मिया अन्सारीले भोग्नु परेको थियो ।
संघहरुबाट आसन्न ओलम्पिक चुनावका लागि प्रतिनिधिहरु आउने क्रम सुरु भएको छ । नेपाल आर्चरी संघबाट रमेश सिवाकोटी प्रतिनिधि बन्दा तदर्थ रुपमा सञ्चालित नेपाल साईक्लिङ संघबाट गोपाल सुन्दरलाल कक्षपती ओलम्पिक प्रतिनिधिको रुपमा आएका छन् ।
नेपाल ओलम्पिक कमिटिले विवादास्पद रुपमा विधान संशोधन गर्दै पुस १३ गते निर्वाचित साधारण सभाको आह्वान गरेको छ । अन्तराष्ट्रिय ओलम्पिक कमिटिले विधान संशोधनलाई स्वीकृति नदिएको अवस्थामै एनओसीले निर्वाचन आह्वान गरेको हो । अध्यक्ष जीवनराम श्रेष्ठले निर्वाचन गराउन आईओसीबाट संशोधिन विधान स्वीकृत गर्न नपर्ने भन्दै निर्वाचनको मिति तोकेका छन् । तर आईओसीले अदालतको विषयमा प्रस्ट पार्न अनुरोध गर्दै विधान संशोधनको विषयलाई रोकेको छ ।
जित्ने अवस्थामा आईओसी देखाएर चुनाव गराउने र पराजित हुने अवस्थामा आईओसी देखाएर निर्वाचन रोक्ने पुरानै रणनीतिमा जीवनराम देखिन्छन् । तर आईओसीको पछिल्लो पत्रले जबर्जस्ती विधान संशोधन गरेर तेस्रो कार्यकालका लागि अध्यक्ष लड्ने जीवनरामको कोशिशमा धक्का लागेको छ ।
अदालतको आदेश अवज्ञा गर्दै एनओसीको साधारण सभाले विधान संशोधनको निर्णय गरेको थियो । अदालतले अपहेलनाको मुद्धामा एनओसीसँग जवाफ माग गरेको छ । अदालतको आदेश र राष्ट्रिय खेलकुद परिषद्का् निर्देशन विपरित जबर्जस्ती विधान संशोधन गर्ने एनओसीविरुद्ध अपहेलनाको मुद्धा प्रमाणित हुने सम्भावना पनि उत्तिकै छ ।
-1750132667.webp)
