काठमाडौं। तल्लो क्रमका अर्जुन घर्ती र कप्तान सोमपाल कामीबीच अर्धशतकीय साझेदारी हुँदा कर्णाली याक्सले नेपाल प्रिमियर लिग (एनपिएल)मा जनकपुर बोल्ड्सलाई १४२ रनको लक्ष्य दिएको छ।
कीर्तिपुरस्थित त्रिवि क्रिकेट मैदानमा कर्णालीका कप्तान सोमपाल कामीले टस जितेर पहिला ब्याटिङ गर्ने निर्णय गरेका थिए। तर, सुरुमा उनको सो निर्णय कर्णालीलाई महँगो सावित भयो।
चर्को शुल्क तिरेर ल्याएको भारतीय पूर्वब्याटर शिखर धवन चल्न सकेनन्। ओपनर देव खनाल एक रनमै पभिलियन फर्किए। लगालग विकेट गुमाइरहेको अवस्थामा अर्जुन र सोमपालले अर्धशतकीय साझेदारी गरेपछि कर्णालीले निर्धारित २० ओभरमा सात विकेट गुमाउँदै १४१ रन बनाएको हो।
यो नै एनपिएलमा अहिलेसम्म बनेको सबैभन्दा ठूलो स्कोर हो। यसअघि विराटनगर किङ्सले उद्घाटन खेलमा जनकपुरविरुद्ध १९ ओभरमा सबै विकेट गुमाउँदै १२७ रन बनाएको थियो।
२२ बल खेलेका अर्जुन दुई चौका र दुई छक्कासित ३३ रन बनाएर आउट भए। सोमपाल १३ बलमा तीन चौका र एक छक्कासहित २९ रन बनाएर अविजित रहे। उनीहरूबीच सातौं विकेटका लागि ५६ रनको विशाल साझेदारी भएको थियो। अर्जुनले १९औं ओभरमा हर्ष ठाकरलाई दुई छक्का र दुई चौका प्रहार गरेका थिए। उक्त ओभरमा उनले ६ बलमै २२ रन जोडे। अर्को ओभरमा सोमपालले जिम्मी निसमको सुरुआती तीन बलमा १४ रन प्रहार गरेपछि कर्णाली मजबुत बनेको थियो। अर्जुन रन आउट भए।
कर्णालीले पावर प्लेमै खराब सुरुआत गरेको थियो। देवलाई ललितनारायण राजवंशीले दुई रनमै बोल्ड गरे। उनी आउट भएसँगै कर्णालीलाई महँगो परेको धवनबाट ठूलो इनिङ्सको आश थियो। तर, नेपाल आउनुभन्दा अगाडि नै चर्चाको शिखरमा रहेका धवन पनि चल्न सकेनन्। १४ बल खेलेका उनी तीन चौकासहित १४ रन खर्चिँदै क्यानेडाली बलर हर्ष ठाकरको बलमा बोल्ड भए।
पावर प्लेमै दुई ओपनर गुमाएपछि कर्णाली दबाबमा परेको थियो। इनिङ्स सम्हाल्दै दरिलो ब्याटिङ गर्नुपर्ने बेला चाड्विक वाल्टन, बाबर र जिशन मक्सूदले पनि आफ्नो जिम्मेवारी पूरा गर्न सकेनन्। जमैकन ब्याटर वाल्टन आठ रनमा मोहम्मद मोहिसिनबाट बोल्ड भए। हङकङका ब्याटर हायातलाई मोहिसिनले नै जिम्मी निसमबाट क्याच आउट गराए। निसम आइतबार मात्रै नेपाल आइपुगेका थिए।
लगातार विकेट गुमिरहेको अवस्थामा गुल्शनकुमार झाले कर्णालीको इनिङ्सलाई अगाडि बढाउने प्रयास गरे। स्लो पिचमा २७ बलको सामना गरेका उनले एक चौका र तीन छक्कासहित ३६ रन बनाए। उनी किशोर महतोबाट बोल्ड भए। गुल्शनको स्कोर नै यो इनिङ्सको उच्च रह्यो।
-1752288200.webp)
