सानो गौचरको मैदान महानगरले बनाउने

काठमाडौं । काठमाडौंको सानो गौचरस्थित फुटबल मैदान काठमाडौं महानगरले बनाउने भएको छ । काठमाडौंभित्र रहेका मैदानलाई स्तरोन्नती र नव निर्माण गर्ने उद्धेश्य अनुरुप महानगरले सानो गौचरको मैदान निर्माण गर्ने भएको हो ।

मैदानको ठेक्का लागिसकेको छ । अब केही दिनमा काम सुरु हुन्छ । महानगरका एक अधिकारीले खेलपाटीसँग भने, एक वर्षभित्र निर्माण कार्य सक्ने लक्ष्य छ ।

सानो गौचरमा बन्ने मैदान कृत्रिम घाँसे मैदानको हुनेछ, जुन १ हजार १ सय ३४ दर्शक क्षमताको हुनेछ ।

सानो गौचरको मैदान निर्माणमा महानगरले झण्डै १७ करोड रुपैयाँ लगानी गर्न लागेको हो । 

काठमाडौं महानगर मेयर बालेन्द्र साहले काठमाडौंभित्र रहेका खेल मैदानको स्तरोन्नती गर्दै खेलकुद पूर्वाधार निर्माणलाई विशेष जोड दिएका छन् ।

महागनरले सानो गौचर सहित पेप्सीकोला, सिफल र बाँसबारीमा समेत फुटबल मैदान निमार्ण गर्दैछ । सानो गौचरको ठेक्का लागिसकेको छ भने बाँकीको ठेक्का लाग्ने क्रममा रहेको छ । अन्य मैदानको समेत यसै वर्षभित्र काम सुरु हुने महानगरले जनाएको छ । महानगरले सबै मैदान कृत्रिम घाँसे मैदानको रुपमा निर्माण गर्न लागेको हो ।