काठमाडौं। चुनावको मुखमा विधान संशोधन गर्ने नेपाल ओलम्पिक कमिटी (एनओसी)को पछिल्लो कदमप्रति प्रधानमन्त्री केपी शर्मा ओलीले गम्भीर चासो व्यक्त गरेका छन्।
ओलम्पिक ‘मुभमेन्ट’भन्दा आफूहरूलाई बाहिर राखिएको गुनासोसहित प्रधानमन्त्री भेट्न पुगेका खेल संघका पदाधिकारीसमक्ष ओलीले एनओसीको पछिल्लो गतिविधिबारे चासो व्यक्त गरेका हुन्।
‘ओलम्पिक छाडा भएको छ। नेपालको कानुन लाग्दैन, आइओसीको चार्टर मात्र भन्छ। अन्तर्राष्ट्रिय नाममा गलत धन्दा चलाइरहेका छन्। विकल्प के छन् ?,’ ओलीको भनाई उद्धृत गर्दै एक संघका पदाधिकारीले भने। प्रधानमन्त्री ओलीले एनओसीका गलत कदमको विकल्प के हुन सक्छ भनी खेल संघका पदाधिकारीसँग जिज्ञासा राखेका थिए।
प्रधानमन्त्री ओलीले आइओसीको नाममा कसैले मनपरी गर्न नपाउने भन्दै यसको समाधानको विषयमा जिज्ञासा राखेका थिए। ओलीले खेलकुदमन्त्री तेजुलाल चौधरी र राष्ट्रिय खेलकुद परिषद् (राखेप)का सदस्यसचिव टंकलाल घिसिङसँग यस विषय छलफल गर्ने विषय भेटमा जानकारी गराएका थिए।
एनओसीका अध्यक्ष जीवनराम श्रेष्ठ विधान संशोधन गरी तेस्रो पटक अध्यक्ष बन्ने दाउमा लागेपछि नयाँ विवाद सिर्जना भएको छ। श्रेष्ठको कदमविरुद्ध एनओसीको बोर्ड बैठकमा दुई सदस्यले ‘नोट अफ डिसेन्ट’ समेत लेखेका थिए।
चार राष्ट्रिय खेल संघहरूले ओलम्पिक ‘मुभमेन्ट’बाट आफूहरूलाई बाहिर राखिएको भन्दै अन्तर्राष्ट्रिय तथा राष्ट्रिय लबिङलाई तीव्र पारेका छन्। व्यक्तिगत स्वार्थका लागि खेलकुदको करिब आधा संख्यालाई बाहिर राखेर ओलम्पिक सञ्चालन भइरहेको भन्दै चार खेल संघले ओलम्पिकमा आबद्धताका लागि अन्तर्राष्ट्रिय महासंघ, अन्तर्राष्ट्रिय ओलम्पिक कमिटी, विशेष अदालत र नेपाल सरकारको ध्यानाकर्षण गराएका छन्।
‘दशकदेखि ओलम्पिक बाहिर राखिएका खेल संघहरूलाई आबद्धता दिन नमिल्ने तर एक व्यक्तिलाई तेस्रो पटक अध्यक्ष बनाउन विधान संशोधन गर्ने ओलम्पिकको कदम लज्जाजनक छ। ओलम्पिक मुभमेन्टमा जोडिने पाउने खेल संघको अधिकारलाई एनओसीले धेरै अड्काएर राख्न सक्दैन,’ एक पदाधिकारीले खेलपाटीसँग भने।
प्रधानमन्त्रीसँगको भेटमा नेपाल घोडचढी संघका अध्यक्ष रवि राजकर्णिकार, नेपाल बेसबल तथा सफ्ट बल संघका अध्यक्ष दीपक न्यौपाने, नेपाल स्केटिङ तथा स्केटबोर्डिङ संघका अध्यक्ष अच्यूत खनाल, नेपाल रग्बी संघका महासचिव गोविन्द घिमिरे, नेपाल क्लाइम्बिङ संघका अध्यक्ष रमेश पौडेल, अल्पाइन स्पोर्ट्स फेडेरेसन नेपालका अध्यक्ष गोविन्दप्रसाद भट्टराई, नेपाल रोइङ संघका महासचिव सम्पन्न श्रेष्ठलगायत थिए।
