भारतकी केपी अनुश्री चितवनमा

काठमाडौं। एभरेस्ट महिला भलिबल लिग (इडब्ल्युभिएल)को फ्रेन्चाइजी चितवन शक्तिले भारतीय खेलाडी केपी अनुश्रीलाई भित्र्याएको छ।

उनी तेस्रो विदेशी खेलाडीको रूपमा चितवन भित्रिएकी हुन्। चितवनले यसअघि अजरबैजानकी आउटसाइड हिटर केन्सिया पावेल्नीको र भारतकी मिडलब्लकर सूर्या एसलाई अनुबन्ध गरिसकेको छ। 

अनुश्री भारतकी युवा स्टार खेलाडी हुन्। उनलाई यस प्रतियोगिताका लागि चितवनले आउटसाइड हिटरको रुपमा टोलीमा भित्र्याएको हो। 
यसअघि पनि एनभीएल क्लब च्याम्पियनसिप र एनभीएल लिगमा बुटबलको एभरेस्ट क्लबमा आबद्ध भई खेलेकी उनी क्लब च्याम्पियनसिपमा उत्कृष्ट खेलाडी र एनभिएल लिगमा उत्कृष्ट स्पाइकरको उपाधि जितेकी खेलाडी हुन्। 

उनी नेपालको भलिबलसँग परिचित अनुहार हुन्। उनी टिममा आबद्ध हुँदा टोली बलियो हुने र नेपाली भलिबल प्रेमी दर्शकका लागि पनि खेल रोमाञ्चक हुने आश गरेको छ। चितवनका लागि नेपाली महिला राष्ट्रिय टिमकी कप्तान अरुणा शाही टिमको मार्की खेलाडीको रुपमा रहेकी छन्।