काठमाडौं। बायाँ हाते फास्ट बलर जोस हल श्रीलंकाविरुद्धको अन्तिम दुई टेस्टका लागि इङ्ल्यान्डको टेस्ट टोलीमा परेका छन्। घाइते मार्क वुडको स्थानमा हललाई टोलीमा समावेश गरिएको हो।
२० वर्षीय हलले प्रथम श्रेणी क्रिकेटमा ६२.७५ को औसतमा १६ विकेट लिएका छन्। मेट्रो बैंक वन डे कपको अन्तिम संस्करणमा हलले आफ्नो टोली लेसेस्टरसायरलाई ट्रफी उचाल्न मद्दत गर्न महत्त्वपूर्ण भूमिका खेले। यससँगै उनले यस महिनाको सुरुमा इङ्ल्यान्ड लायन्सबाट डेब्यु गर्दा पनि धेरै प्रभावित पारेका थिए। श्रीलंकासँग एक मात्र अभ्यास खेलमा इङ्ल्यान्ड लायन्स सात विकेटले विजयी भएको थियो। उक्त खेलमा हलले दुई इनिङ्समा पाँच विकेट लिएका थिए।
हल हाल ग्लुसेस्टरसायरविरुद्धको काउन्टी च्याम्पियनसिप खेलको लागि लिसेस्टरसायर टोलीको हिस्सा छन्। यद्यपि, सोमबार राति लन्डनमा इङ्ल्यान्डको टोली भेला हुने भएकाले हलले खेलको अन्तिम दिन काउन्टी टोली छोड्ने सम्भावना छ। दोस्रो टेस्ट बिहीबारदेखि लर्ड्समा सुरु हुँदैछ। अन्तिम टेस्ट सेप्टेम्बर ६ बाट ओभलमा सुरु हुनेछ।
अन्तिम दुई टेस्ट खेलका लागि इङ्ल्यान्डका लागि छनोट गरिएको १३ सदस्यीय टोलीमा एउटा मात्र परिवर्तन गरिएको छ। तर, ओलि स्टोनले वुडको स्थानमा अन्तिम ११ मा खेल्ने अपेक्षा गरिएको छ। स्टोनले इङ्ल्यान्डका लागि अहिलेसम्म तीनवटा टेस्ट खेलिसकेका छन्। उनले सन् २०२१ मा न्युजिल्यान्डविरुद्ध टेस्ट डेब्यु गरेका थिए।
