काठमाडौं। नेपाली गल्फर सुवास तामाङले उत्कृष्ट प्रदर्शन गर्दै ८ अन्डर २८० स्कोरसहित छैटौं स्थानमा रहेर चेन्नाई प्रो–च्याम्पियनसिप २०२४ टुंग्याएका छन्। उनी प्रोफसनल गल्फ टुर अफ इन्डिया (पिजिटिआई) को प्रतियोगितामा शीर्ष १० रहेको पहिलोपल्ट हो।
टिएनजिएफ कोस्मो गल्फ कोर्समा पहिलो दिन ४ अन्डर खेलेका उनले उत्कृष्ट लयलाई कायमै राख्दै दोस्रो चरणको स्कोर ३ अन्डरमा राखेका थिए। तेस्रो दिन भने राम्रो भएन र ४ ओभर खेल्न पुगे। तर, अन्तिम दिन शुक्रबार एक इगल, ६ बर्डी र ३ बोगी खेल्दै ५ अन्डरको स्कोरसहित उनी पिजिटिआईमा आफ्नो पहिलो सिजनको प्रतियोगितामा सबभन्दा माथिल्लो छैटौं स्थानमा रहेका हुन्।
समान ८ अन्डरको स्कोरसहित भारतीय ६ जना गल्फर पनि सुवाससँगै संयुक्त छैटौं स्थानमा रहे। कुल भारु ५० लाख (नेपाली रुपैयाँ ८० लाख) पुरस्कारको प्रतियोगितामा सुवासले भारु १ लाख २० हजार २ सय ७ हात पारे। १६ अन्डर २७२ खेल्दै चेन्नाई प्रो–च्याम्पियनसिपको उपाधि जितेका भारतीय प्रो ध्रुव सेरनले भारु ७ लाख ५० हजार पाए। अर्का नेपाली खेलाडी शुक्रबहादुर राई भने चेन्नाईमा सहभागी भएनन्।
१९औं दक्षिण एसियाली खेलकुद (साग २०१९) मा दुई स्वर्णपदक जितेका सुवास क्वालिफाइङ कुलमार्फत् पीजीटीआईको यो सिजन (सन् २०२४) मा छनोट भएका थिए। त्यसयता उनले पिजिटिआईका १० प्रतियोगिता खेलेका छन्, जसमध्ये ४ प्रतियोगितामा ‘कट’ बनाएका छन्।
चेन्नाईको प्रदर्शनअघि उनी टाटा स्टिल पिजिटिआई प्लेयर्स च्याम्पियनसिपमा २१औं, भुटी मास्टर्समा २९औं र मैसुरु ओपनमा ११औं भएका थिए। कटब नाएका ४ प्रतियोगितामा भारु ५ लाख १२ हजार ४ सय ७ पुरस्कार हात पारेका उनी ‘पिजिटिआई अर्डर अफ मेरिट’मा ५६औं स्थानमा छन्।
-1750064258.webp)
-1750047432.webp)
