साकिबमाथि हत्यामा संलग्न रहेको आरोप
काठमाडौं। बंगलादेशका स्टार क्रिकेटर साकिब अल हसन हत्यामा संलग्न रहेको आरोप लागेको छ। हालै बंगलादेशमा पूर्वप्रधानमन्त्री शेख हसिनविरुद्धको आन्दोलनमा ४०० भन्दा बढीले ज्यान गुमाएका थिए।
साकिबसहित १४७ जनामाथि एक विद्यार्थीको हत्या गरेको आरोप छ। ५ अगस्टमा गोली लागेर रुबेल इस्लामको मृत्यु भएको थियो। उक्त विद्यार्थीका बुबा रफिकुल इस्लामले ढाकामा एफआईआर दर्ता गरेका छन्।
डेली स्टारको रिपोर्टका अनुसार रफिकुलले अगस्ट ५ मा उनका छोरा रुबेल अदबरको रिङरोड क्षेत्रमा विरोध प्रदर्शन गरिरहेको बताएका छन्। जसमा रुबेलसँगै अन्य धेरै विद्यार्थी पनि थिए। साकिबसहित १४७ जनालाई आन्दोलनकारीमाथि गोली चलाउने आदेश दिएको आरोप लागेको थियो। गोली लागेर घाइते भएका रुबेललाई अस्पतालमा भर्ना गरिएको थियो तर २ दिनपछि उनको मृत्यु भएको थियो। त्यसपछि बाबुले प्रहरी चौकीमा उजुरी दिएका थिए।
रफिकुलले साकिबविरुद्ध मात्र नभई पूर्व प्रधानमन्त्री शेख हसिना, वकिल र धेरै पूर्वमन्त्रीहरूविरुद्ध पनि मुद्दा दायर गरेका छन्। १४७ अभियुक्तमध्ये अधिकांश शेख हसिनाको पार्टी अवामी लिगका हुन्।
३७ वर्षीय साकिब अवामी लिगका पूर्वसांसद हुन्। देशमा हिंसात्मक प्रदर्शन भएपछि शेख हसिनाले आफ्नो पदबाट राजीनामा दिनुपरेको थियो। उनले पनि देश छाड्नुपर्यो। हसिनाको राजीनामापछि नोबेल पुरस्कार विजेता मोहम्मद युनुसले बंगलादेशको अन्तरिम सरकार सम्हालेका छन्।
साकिब हाल बंगलादेश क्रिकेट टोलीको तर्फबाट पाकिस्तानमा टेस्ट खेल्दै छन्। उनको टोलीले टेस्ट सिरिजको पहिलो खेल रावलपिण्डीमा खेल्दैछ। सिरिजमा २ टेस्ट खेलिने छ भने दोस्रो खेल पनि अगस्ट ३० बाट रावलपिण्डीमा हुनेछ।
पीटीआईका अनुसार रफिकुल इस्मलाका छोरा रुबेलको आन्दोलनका क्रममा अगस्त ७ मा मृत्यु भएको थियो। एफआईआरमा साकिबलाई २७ वा २८ नम्बरमा आरोपी बनाइएको छ। ५ अगस्टमा भएको विरोध प्रदर्शनका क्रममा शकिब बंगलादेशमा नभएको पनि रिपोर्टले जनाएको छ।
बंगलादेशमा भएको हिंसात्मक प्रदर्शनका क्रममा साकिब क्यानडामा थिए। शकिबले २६ जुलाईदेखि ९ अगस्टसम्म क्यानडामा भएको ग्लोबल ट्वान्टी–२० लिगमा भाग लिएका थिए। यति मात्र होइन, २६ जुलाईअघि उनी अमेरिकामा मेजर लिग क्रिकेट खेलिरहेका थिए।
बंगलादेशका यो स्टार अलराउन्डर मैदानमा र बाहिर विवादका कारण प्रायः चर्चामा रहन्छन्। यसै वर्षको अप्रिलमा उनको ग्राउन्ड स्टाफसँग झगडा भएको थियो। उनको फोन खोस्ने प्रयास गरेको भन्दै थप्पड हान्ने धम्कीसमेत दिएका थिए। यसका साथै उनले विपक्षी टोलीका खेलाडी र अम्पायरसँग पनि धेरै पटक मैदानमा झगडा गरेका छन्।
साकिब यसै वर्षको जनवरीमा अवामी लिगको टिकटबाट सांसद बनेका थिए। तर, प्रधानमन्त्री शेख हसिनाले सत्ता गुमाएपछि उनको सांसदको हैसियत पनि खोसियो।
३७ वर्षीय अनुभवी खेलाडी साकिबले बंगलादेशका लागि अहिलेसम्म ६७ टेस्ट, २४७ एकदिवसीय र १२९ ट्वान्टी–२० खेल खेलेका छन्। यस अवधिमा उनले टेस्टमा ४५०५ रन र २३७ विकेट लिएका छन्। जहाँ एकदिवसीय अन्तर्राष्ट्रियमा उनको नाममा ७५७० रन र ३१७ विकेट छ। ट्वान्टी–२० मा उनले २५५१ रन र १४९ विकेट लिएका छन्।
