भदाै ७  मा टुसाल विद्यालयस्तरीय पौडी प्रतियोगिता

काठमाडौं। तेस्रो संस्करणको टुसाल विद्यालयस्तरीय पौडी प्रतियोगिताको आयोजना भाद्र ७ गते हुने भएको छ।

टुसाल मल्टिभेन्यू प्रालिले शुक्रबार पत्रकार सम्मेलनको आयोजना गर्दै प्रतियोगिताबारे जानकारी दिएको हो। प्रतियोगिता तार्केश्वर–८ स्थित टुसाल मल्टिभेन्युको स्विमिङ पुलमा हुने मल्टिभेन्यूका महाप्रबन्धक प्रवीण मान सिंह बस्नेतले बताए।

 प्रतियोगिता २५ मिटरको फ्री स्टाइल विधामा प्रतिस्पर्धा हुनेछ। प्रतियोगितामा जुनियर ब्वाइज, जुनियर गर्ल्स र सिनियर ब्वाइज र सिनियर गर्ल्स गरी ४ वटा विधामा प्रतिस्पर्धा गराइनेछ।

विजयी खेलाडीहरूलाई ट्रफी, मेडल तथा अन्य पुरस्कारहरूले सम्मान गरिने आयोजकले जनाएको छ। प्रतियोगितामा झन्डै एक सय खेलाडीको सहभागिता रहने आयोजकले अपेक्षा राखेको छ। हालसम्म २० वटा विद्यालयले सहभागिताका लागि नाम दर्ता गरिसकेको र यस पटक सरकारी विद्यालयका विद्यार्थीले निःशुल्क सहभागिता गर्ने बताइएको छ।

प्रतियोगिताको प्राविधिक र निर्णायकको जिम्मेवारी विष्णु खड्का लगायत ११ जनाको टिमले जिम्मा लिनेछन्। प्रतियोगितामा मेडिकल सपोर्ट मनमोहन मेमोरियल मेडिकल कलेज तथा शिक्षण अस्पतालको रहने छ। अस्पतालले प्रतियोगिताको अवधिभर एम्बुलेन्स, एक जना चिकित्सक र दुई जना नर्स सहितको सेवा दिने सम्झौता भएको आयोजकले जनाएको छ।

यस अघि गत वर्ष असार १५ गते मल्टिभेन्यूले दोस्रो संस्करणको आयोजना गरेको थियो। कार्यक्रममा टुसाल मल्टिभेन्यूका प्रबन्ध निर्देशक दीपेन्द्र थापा, सूर्य नेपालका तर्फबाट अर्जुन केसी वरिष्ठ खेल पत्रकार श्याम चित्रकार र विभिन्न मिडिया हाउसका सञ्चारकर्मीको सहभागिता रहेको थियो।